星期六的深夜﹐無無聊聊無o野做但又唔想訓﹐入來寫寫久違了的hompy。

今日要參加一小的運動會﹐第四年了﹗記得之前的三年都是凍得要命的日子﹐要在空曠的運動場食風﹐有一年仲係十度以下加落雨﹐凍到頭痛之餘更擔心小朋友會冷病。是今年早了嗎﹖現在雖然是十一月但還是二十幾度﹐果真是全球溫室效應。

心情有點緊張﹐唔知今年一小能否拿到獎﹐過去三年都拿到接力比賽獎。今年他更參加了學校的田徑隊﹐一星期返學校練三日田徑﹐照道理應該會有點成積的﹐亦看得出佢好想跑出拿獎牌﹐好像尋晚對我說“好嬲呀﹗比同學笑﹐話我係火箭﹐我唔鍾意做火箭”﹐原來是上體育堂時跑得快比同學拿來說笑﹐但心o個句係咪真嬲先﹐一定唔係囉﹐事關佢最鍾意講反話。所以如果拿不到獎一定好失望﹐兩個星期後他還要代表學校參加學界比賽﹐真係唔講得笑。為了練田徑他不知哭鬧過多少次了﹐一來升了四年級﹐功課越來越多﹐二來編了入精英班﹐老師要求亦相對較高。再加上其他課外活動﹐真的很吃力。但他又不願意放棄參加田徑隊﹐說報了名參加比賽不能退出的。

我想可能比賽完了就讓他退出田徑隊﹐或者下一年不參加好了﹐因為真的兼顧不到﹐而且他的成積也不是太好﹐始終應該以學業為重﹐所以頂多玩一年﹐嘗試過這些難得的經驗算了﹗

加油﹗﹗﹗努力呀﹗﹗﹗媽咪支持你﹐盡了力輸了也沒甚麼大不了。

報告賽果﹕60M: Gold medal, 4 x 100M: Bronze medal

學界比賽﹕100M 和 4x100M 都輸了﹐決賽都入唔倒﹐一小話D人跑得超快﹐好犀利。呢D叫做一山還有一山高﹐唔出去見識下又點知呢個世界有幾大呢﹐細路!

上星期參加了饑饉30﹐這是我第一次參加這活動﹐本來都耽心堅持唔住o架﹐諗住有心咪得囉﹐頂唔住就會食o野。點知竟然真的能守到最後﹐雖然如此﹐但我參加的是饑饉30日營﹐仲要係自制豪華版個種﹐如果話要體會飢餓貧窮的話﹐就真係未必有好深的體會。因為我和家姐兩家人帶住三個細路仔﹐都唔係好敢太搏﹐第一日當營友在烈日當空的時候赤著腳去玩集體活動時﹐我們就坐在看台傾計﹑打機和下棋﹐到五六點時才走到草地上跑下坐下﹐到晚上又可回家高床暖枕地睡覺。

到第二朝要早上十時回營﹐我們又慢騰騰的下午才到場﹐還要整杯麥記奶昔充飢。所以雖然係就係好肚餓﹐但到唔算好辛苦﹐尤其係D細路﹐大會要大家赤腳活動是想我們體會在山區無鞋著的小孩苦況﹐但一小就覺得好好玩﹐唔著鞋周圍走好free喎。到完場後﹐家姐又話要食餐好的去開心下﹐一小表哥話想食翅喎﹐就係咁晚飯時又蝦又魚又翅﹐你話D細路係唔係真係會感受到貧窮的苦況呢﹗尤其是當我們填問卷時要寫參加目的﹐一小就話係家人威逼﹐真係比佢激死﹐我真係唔知佢係玩定係講真﹐究竟佢明唔明。

Anyway, 對我來說參加饑饉主要目的有三﹐一係親子活動﹐二係出一點力籌款﹐三挑戰一下自己的能力。目的是應該達到了﹐但卻有點失落﹐當見到那些十幾歲的年青人﹐個個滿腔熱情﹐互相鼓勵﹐懷着興奮的心情去完成這次活動﹐高舉着證書影相時的興奮心情﹐真的很羨慕﹐青年人真的熱情衝勁無限。

忙了好幾個月個新services終於係0424正式出街了﹐雖然還有很多手尾要跟﹐但總算叫做完成了一個階段﹐希望可以過返D正常些的生活﹐唔使晚晚罰留堂咁要做到熄燈先走得﹐唔使十點幾先食飯(真係救命﹗個肚腩可能因為咁而大左幾寸)﹐唔使疲倦到走堂唔陪一小去踢波。雖然係咁辛苦﹐但做呢個project都有開心的地方﹐就係感受到每一個同事都好努力好commit。真係有少少懷念晚晚和A同事review status﹐工作一樣一樣地完成到尾聲﹐又或和C同事講電話時互相不停地放蚊﹐不停地喊好眼訓﹐真係好搞笑。

今天總於可以得閑坐低寫下hompy, 不過話時話你有無留意now.com最近都出左個新services叫moov呀﹗好似幾好咁喎﹐我而家就係一路聽住歌一路寫hompy﹐幾好feel o架﹐你都試下啦﹗

原來已經兩個月無update hompy 了﹐轉眼間新年假期又完了﹐不經不覺的就過了九日﹐除了忙著過新年外﹐襯假期請了幾日去台灣走一躺。今次得著的是一個字— 倦﹑好倦﹐當你心身疲累的時候﹐千萬別去那些大都會旅行﹐除了不停的食和行街之外﹐亦都只有一個行字﹐好像去六福村和故宮博物館等地方亦都是企和行﹐食出名抵吃的自助餐亦然......真的好倦。

至於美食﹐總算試了很多東西﹐都食得幾開心架﹐可惜還有很多樣野未食到(因為真的太飽了)﹐有點失望的是士林夜市﹐覺得有點名過於實。

旅途中最好笑的事件有二﹐第一件是叫一小講國語就唔肯講﹐但就係條街都大大聲聲唱國歌。第二件是在捷運站回酒店途中發現一大係sogo 唔覺意做了三隻手﹐拿了別人的購物袋﹐裡面是......一條紅褲仔﹐別心邪﹐那是一條童裝褲不是女裝內內。

十一月的最後一日﹐有兩位好同事都不約而同的說有張贈券今天到期問有沒有人有興趣。這提醒了我﹐我也有張一小贈券今天到期﹐所以回家後要哪哪聲用左去﹐唔好晒。

這張贈券是一小係幾個星期前的某天給我的﹐當日到書店買了幾本書﹐吃完晚飯回家後立即拿著本書睇﹐睇睇下一小走入來問我睇到邊﹐我話十幾頁啦﹐佢話如果睇到第三十四頁就有獎﹐之後就出去係張檯度唔知寫d 乜o野﹐寫完後又返入來問我睇到邊度﹐如是者問了幾次﹐到我睇到第三十四頁話比佢知之後﹐佢比左三張贈券我﹐三張佢既自制贈券。

贈券1: $0.0 清潔檯面一次﹐任何時候都可以用
贈券2: $0.1 揼骨十分鐘﹐2005年11月內使用
贈券3: $0.0 溫習﹐任何時候都可以用

我當時即刻拿出第三張贈券同佢講我緊係揀呢張啦﹐因為佢應承左我溫書但未溫﹐於是佢講左聲好﹐然後拿了張贈券走﹐唔好以為佢咁乖即刻去溫書﹐原來他走去改過張贈券﹐將“任何時候都可以用”改為“考試時用”﹐真係好鬼死矛。

之後我就擺埋左幾張贈券無再理佢喇﹐十一月的最後一天﹐同事提醒我要行使贈券﹐當我拿出起贈券時﹐一小問你仲記得咩﹐我話你比我o既野我點會唔緊得係記得喎﹐就係咁我享受左十分鐘既揼骨服務了!

星期二開會時﹐同事H多謝同事R在工作上的努力﹐知道她因為某project好忙好辛勞﹐同事R話其實都唔係太忙﹐然後同事A說笑話佢有時間寫hompy都應該唔係好忙﹐咁大家見我咁耐無係呢度出現就應該知道我有幾忙......

近排除了工作很忙之外﹐有時間在家就多數會同栢芝﹑中基和達叔交流下牌術﹐我房企個一大都好鍾意同人切磋呢樣國粹﹐所以我唔係無時間上來就係無電腦用來寫o野囉。同事P真係好唔話得﹐知道我o既情況竟然送左部notebook比我﹐真係多謝晒佢個......avatar 。

一小見我地兩個輪住用個電腦就緊係會走來八掛下﹐他除了被那些「出色」的配音吸引外﹐間中都會問下呢樣問下個樣﹐我諗佢好快就會學識呢個智力遊戲﹐我都唔會好避忌咁唔想佢學o既﹐佢初初都好緊張咁問我係唔係打真錢﹐我話緊係唔係啦﹐之後佢講呢個係動腦筋遊戲﹐唔賭錢咪得囉。但有一次我輸晒D代幣時﹐他竟然同我講媽咪你不如打真錢啦﹐咁你會謹慎D﹐又好似好有道理咁喎﹐但我又諗究竟應該點答佢好呢﹐唔通話遊戲o黎o架姐﹐唔使咁認真﹖但遊戲就可以唔認真o架啦咩﹐又好似唔係幾o岩喎﹗其實所有o野都可以有唔同說法﹐睇下係用邊個角度去講同你想達到咩目的o架姐。

某年某日﹐還是小女孩的我﹐為家的附近開了些粉而十分高興﹐因為不用再到對面的士多買那些鋪滿塵或者間中會過期的零食了。些粉又乾淨又有冷氣歎﹐有好味的思樂冰﹐可以慢慢睇慢慢揀﹐最重要的是那時膽小的我不用再回答要買些甚麼。過了一段日子﹐士多關了門﹐我再也沒見過那個胖胖的老闆娘﹑滿面笑容的老闆和他們幾個時常都污濁濁的小孩子。那時我是這樣想的﹐它的關門一定和些粉有關﹐我亦感到有點內疚。

某年某日的晚上﹐大膽地跟他上夜校的數學班﹐天曉得當日竟然是數學測驗﹐整晚戰戰兢兢地度過﹐放學後回到家的大門口﹐我說肚子餓想去些粉買東西吃﹐但我們沒有去我家附近的些粉﹐反而走多十幾分鐘的路﹐去了他家附近的那一間﹐買了公仔麵和一樣已經不記得是甚麼的東西﹐然後回家﹐在路上他說不要吃那麼多公仔麵﹐公仔麵有臘質對身體無益。那次是第一次亦是最後一次和他去些粉。

某年某日姐姐竟然去些粉做暑期工﹐心中滿腹疑惑﹐為甚麼有這麼多的工作不做要出來拋頭露面 (天呀﹗我是多麼的老套)﹐還要當夜班很危險呢﹗我想那時所謂的夜班大概是最夜11點吧﹐應該不是那麼大不了的事﹐否則媽媽也不會讓她上班啦﹗現在回想起來﹐家姐的性格根本就是喜歡與人多接觸﹐讀的是酒店管理﹐畢業後當了兩年空姐﹐然後做Sale & Marketing 直至現在﹐那一樣不是對人的工作。其實我和家姐的性格真的很不相似﹐小時候亦不很投契﹐所以當她在些粉上班的時候我極少會去光顧﹐一來沒有甚麼話說﹐二來覺得光顧她有怪怪的感覺。現在我們的感情比以前好多了﹐我想人大了就會這樣吧。

這些就是我和些粉的一些人﹑一些事。

呵呵﹗被“嘈”點中了, 很高興能夠在這大家庭認識到這位新朋友﹐但由於最近工作太忙未來得及回信的時候又有幸被“豬屎”點中﹐這個遊戲咁有趣咁好玩我緊奉陪。咪住﹗咁我應該寫五個定十個怪癖先﹐邊o黎得就咁多怪癖丫﹐一於二合一一齊覆。

指名者：嘈　  相關文章：Blog Tag  我的怪癖  
指名者：豬屎 相關文章：Blog Tag  我的怪癖 
指名者：九記 相關文章：3Q for picking up me ha ha

遊戲玩法：
在一些英文網站看到這種有趣的Blog Tag遊戲，規則很簡單。開始遊戲的人出一個題目，在自己的blog上寫下答案，然後把題目丟給另外五個人，在文末附上這五個人的連結，並且到這些人的留言版留言，這五個被tag到的人，在自己的blog註明(並附上連結)是從哪一個blogger那裡傳來的題目(可用「引用」功能，但因hompy未有得trackback，請用人手啦)，然後寫下自己的答案，再去貼另外五個人，如此繼續下去。

古怪癖一﹕每年夏天都會像比磁石般吸去泳衣counter買一件泳衣。

古怪癖二﹕放工後筋疲力盡﹐回到家晚飯當宵夜﹐吃得滿飽後立刻躺在床上﹐覺得很滿足。(注意﹕這是不健康的減壓方法﹐勿學﹗)

古怪癖三﹕冬天會浸係充滿熱水的浴缸訓著覺﹐訓醒放去一些冷了的水再加熱水再浸過。

古怪癖四﹕食蝦餃燒賣時會盡量用舌頭分辨出肥豬肉﹐然後吐出。

古怪癖五﹕鍾意食生果﹐但唔鍾意食煮過既生果﹐尤其是那些煲到爛熟的﹐好難食。

我點的五個人是：(唔......應該係十個人先o岩)
本來想pick 一些未被pick過的朋友﹐但實在太難搵啦﹐所以唔好意思我要再pick你。

diver﹐思念﹐夜流星﹐傻蛙﹐少林功夫的確勁﹐
小釉 ﹐美雪 ﹐番茄﹐女魔頭﹐龍貓
為九記而tag 的朋友﹕VO_ov ﹐輸通天﹐一小 ﹐小妹Hedia﹐電車佬