前日終於親眼睇咗套劇啦！講真啲戲冇我諗咁差，可能我之前已經大量打底，同埋我知道佢地只係排咗幾日，點都不自覺咁加咗啲同情分。不過，佢地真係有＂跳舞＂，好驚呀！！我要將啲戲分開唻講，因為兩者完全唔＂啦更＂。

首先講吓啲戲，分別有三個短篇，全部都係魚小姐同小Ray做主要演員。第一個係講一個攝影師同模del既愛情故仔，由one night stand開始，故仔極之老套，講模del用one night stand麻醉自己，點知遇著個真心鍾意自己既攝影師。當攝影師知道佢當自己係性玩伴時決定唔玩，模del後悔之後繼續one night stand。做呢啲已經做過十萬次既故仔，一定要有一啲特別既觀點或角度which is 佢完全無，冇戲build up兩個人既性格同background，真係睇同我陷入半睡狀態！到最尾＂最憎係你＂既所謂監製如佢所願出場十秒做大茄去酒吧溝模del，一出場笑聲震天。我希望佢唔好以為自己風趣引到人笑，人地係覺得咁款出唻酒吧溝女仲溝好笑咋！

第二個短篇係改編三順劇本，講一個電車男同傻妹仔既故仔，係最好睇既一個（口痕友實話我偏幫，我。冇。，有睇既正常人都會有同感！）。原本三順寫個女仔係個女強人，宜家改咗做一個傻傻地可可愛愛既妹妹，有啲神來之筆，（我諗應該唔係前導演大人改，佢冇咁既sense)兩個演員做得幾好，輕輕鬆鬆！不過啲light change位有啲問題，好似冇執咁，演員想change之前之後走都得。

第三個同第一個犯同樣問題，角色冇野，表情聲音由始至終都冇變化，太多懶深奧但其賁冇內涵既對白，好悶！

OK，講萬眾期待既想死＂跳舞＂，第一個佢地叫＂The show must go on＂，其實啲演員只不過係作狀地扭吓身將台上啲紗擰走，然後入後台攞啲細pros（for example電話）放係台上。都唔知佢想做咩Ｘ野，你唔係以為啲觀眾盲咗睇唔到你攞個電話出唻呀嗎？咁如果你預咗啲觀眾睇到個電話，可唔可以解釋吓點解佢要咁做？最好笑我見到家姐ＵＮ住咁攞支酒出唻，真係睇到我噴飯！我幾肯定呢個貢brilliant既idea係出自導演大人，佢一縷都覺得開燈轉景冇問題，之前搬運工人放梳化係條街度佢都做得出，佢以為啲觀眾白痴！

之後個啲所謂舞都唔知想想表達啲咩，重要改埋啲懶有野既名，咩＜寂寞的風信子＞，＜星空下的母忘我＞，＜最後的玫瑰＞，不知所謂，無啦啦＜寂寞的風信子＞有兩條女出唻爭仔拉拉扯扯，仲有個個伸直隻死人腳然後隻手由上至下劃個半圓既動作重覆出現Ｎ次，唉。。。完全想死！！！！！

再講一次，最憎個啲勁扮野懶有野既戲！！嘔～～～

幾日都冇寫關於套劇既野，因為我諗我已經退出咗就費事再浪費精神去理人家既事。不過我都係犯賤，知道佢地咁不負責任地繼續 on show，個心始終扯住扯住！

佢地今日終於on show，友人亨利睇完之後第一句就問我邊個係導演，場刊上面冇寫，哈哈，我都唔知點講。我未講完佢就同我講三個短篇中兩個非常空洞，根本唔知佢想表達啲咩，仲有啲節奏超慢，最少可以快30%！

我跟住問佢咁佢地有冇跳舞，佢好絕核咁話：『所有業餘劇團都係咁跳，唔俾comments！』唉。。。無奈，唔識跳就唔好獻醜，上到台就應該俾最好既觀眾，人地俾八十蚊唔係想睇呢啲求其拉雜成軍，完全冇誠意既製作囉。佢知道我聽日睇，佢話咁你自己考慮吓。。。

咖哩酸頭先仲同我講話謝幕後魚小姐有同觀眾講話成CREW人由三十幾人到宜家得番十幾人，成套劇都係排咗十日。雖然我好欣賞佢咁硬淨一丁友撐住個劇，不過個人意見覺得唔應該咁同觀眾講，咁係咪話：『喂，十日排到咁，算係咁，你仲想點？』我唔知佢有冇咁諗，我希望佢冇。講真作為觀眾我唔會理你背後有啲咩問題，爛show就係爛show，冇得解釋囉！

如果咁啱有劇組人員路過睇到，希望你明白，我唔係落井下石，只係將其中一個觀眾既意見話俾你知（Anyway，如果你點都要覺得我係，是但你點諗啦！）

我聽日睇，遲啲再講多啲。

香港咩人都有，但係咁都俾我遇到個咁不知所謂既人，真係唔好彩，我講既係個個所謂監製。其實我好少憎人，包括女大導萬般不是我都只係嬲佢做既野，我冇憎佢。但係呢個死人所謂監製實在太乞人憎，雖然個劇搞成咁好大部分原因係因為大導既任性，但係我覺得佢身為監製一定要上身。

唔明點解佢可以由得套劇爛成咁而咩都唔做，問佢佢只係話佢已經同大導講過。頂，你係監製喎，你覺得有問題講吓冇用就算？你唔識制止佢架咩？正如阿媽見到佢八歲既仔係個廳度肆無忌憚開大ＨＩＦＩ貢睇冇格四仔，你講叫佢熄機唔聽會唔會就咁算？喂，唔打佢一身點都要先熄機等佢冇得睇啦！唔係要等帶埋女同學一齊睇學野先制止？

最憎既唔係佢冇盡到監製既責任，而係佢做野既態度，極度唔認真，成日係唔适當時候懶好笑，之前講過經典既＂食蕉＂事件。仲有一次排道場（場戲係用一種好虛既方法表達淫亂，所有角色都要蓋住一塊紗好迷幻咁行），當時佢係代某個演員，大部分演員都盡量投入個迷幻ＦＥＥＬ，只有佢掛住淫笑好似風車貢猛ＦＩＮＧ條紗。排完個場戲我走去問佢（溫柔地）：『想請問正式係咪會咁ＦＩＮＧ？』佢答我（輕佻）：『唔係，我唔係真架！』我即刻大聲講：『你唔係真就唔好亂咁做啦！』佢即刻收皮。

好喇，到宜家搞到一鑊粥，有人提議ＣＵＴ咗個現有劇本再睇吓做幾個短劇補鑊（which is 我完全唔認同），問邊個仲有興趣玩同做咩崗位，佢竟然咁寫：

8. 所謂監製 (少於十句對白的演員 + 茶水)

Ｘ街，好Ｘ好笑呀？做茶水？宜家咩時候呀？仲懶好笑。真係好想再join等佢斟茶俾我！

一句到尾，最憎係你！（仲押韻tim，勁！）

相傳自殺既人到咗地獄會永不超生，所以人唔到咗冇得揀既情況係唔會選擇自殺。我都係一樣，冇得揀，我。自。殺。了！

講既係套劇，我今日終於同導演監製講我唔玩。當三順走個時，好多人都諗／想我走，坦白講我當時的確想走，但咖哩酸個一封真情email，令我停一停諗咗一諗，就係呢一諗，今我捱多十幾日。個時我好天真地覺得我應該可以幫手令到套劇上到台冇咁爛，宜家直情覺得自己好天真好傻兼且自大。人家根本唔想你幫甚至覺得你好Ｘ煩！

醒喇，唔好再做啲自己辛苦人地討厭既野，最後忠告：

要對觀眾負責，唔理佢係你既friend或者係街客！

尋日導演大人終於俾人醒咗一巴，事發係貢既，同之前排戲一樣，佢又帶同佢既新劇本同各位演員排戲（當時我仲未到，啲details都係咖哩酸覆述俾我聽），個劇本改到只有２３頁（據我經驗，一般做出唻大約會係四十分鐘左右），佢非常興高采烈咁叫啲演員圍讀一次。但係啲演員讀完後大家都極"pai"，連俾comments都唔想，連一直撐佢既魚小姐都知道事態嚴重，即拉佢出去密斟。

經過一番唇舌，大導終於肯就範，同意收回個２３頁劇本只係係之前個劇本上面作出部份改動。可能佢一時接受唔到自己既傑作得唔到佢expect既支持（此時佢應該可以感受到當時佢俾三順既痛苦，所謂因果循環。。。），我見佢番嚟房時雙眼寫住 "I am lost"，連宣佈收回個２３頁劇本都係魚小姐講。

不過一切已經太遲，正如馬吉士話齋，佢既信譽係大部份演員眼中已經破產，大部份演員對呢套戲既熱誠都俾佢任性既行為磨滅到蕩然無存，我強烈地感受到某些演員已發出"我唔想繼續"既signal。我諗佢依家應該知道呢個殘局已經無法挽回，唯一可做又對得起自己既就係取消個show。

可以開口話取消個show既人，成個production中只有你一個（我絕對唔相信個個所謂監製可以reject你），可能你會覺得所有人將呢個決定賴係你身上好殘忍，你好慘要一個人承受呢個惡果，不過我一啲都唔會同情你，因為

你。活。該！

偉大既導演又一鉅獻，佢將劇中神婆Jennifer (原本三順做既角色)寫成鍾意睇Keroro。原著劇本係寫佢要睇水晶球唔去得飲野，宜家就寫成佢要返屋企追Keroro。OK，challenge之前我本住學野既精神，厚面皮貢問吓創意非常既導演點解要咁改。佢居然話因為宜家佢家姐做，咁樣改佢會容易講啲。簡直bullshit，想敢問一句導演大人，貴家組自細係香港長大。典解佢講一個日文字"Keroro"會比中文字來得容易呢？要知道劇本中每一句對白都有其function，一係展露劇中人性格，一係交代劇情，唔係求其可以改你明唔明？其實我問嚟都多餘，佢咁樣自以為是咁改人地既劇本，點會明？就算佢明，佢又點會放低佢高崇既自尊？

當時我聽到佢咁講，好自然就答一句話：『咁啲觀眾會覺得Jennifer 白痴喎！』點知佢好大聲話：『睇Keroro唔係白痴！』唉，都唔知點解佢咁大反應，可能佢對Keroro有極厚既情意結，不過醒少少既人都知我唔會咁既意思。我自己都睇Keroro，唔通我連自己都話埋咩？只不過覺得神婆睇Keroro有啲牛頭口唔搭馬咀啫！

排完之後同小妹妹一齊走，佢都覺得個劇本改成咁好有問題，不過礙於演員身份唔方便當面撐我，都好，起碼知道有人知死，唔知女大導幾時會醒呢？

如果你既答案係YES，我可唔可以好誠懇咁同你講句：『你玩Ｘ夠未呀？Ｘ街！』

點解我咁慶？因為尋日竟然俾我遇到一件我只係係電影或電視聽過既野，而呢個term聽起上嚟 幾pro但係收到既人會想或者會直爆粗口，最匪夷所思係竟然俾我係劇場遇到，呢樣野就係傳說中既　飛。紙。仔！

其實飛紙仔都冇問題，我唔怪你，但係你個啲手寫紙仔係鬼畫符，我諗只係鬼先睇得明。啲字核突我都唔怪你，之但係你點可以咁厚顏無恥咁同啲演員講話啲對白係short form叫佢地自己作長佢？舉一個例子等你地笑吓（不過我當時真係笑唔出囉）

劇中有個角色叫Daniel，佢係戲中係情趣用品店老闆，劇情講佢要帶一啲情趣用品去廣告公司present，導演大人手寫既對白係咁：

『玩具，思考，刺激，加Ｘ英潮吹手！』（註：佢想寫加藤鷹潮吹手，不過佢唔識寫個藤字）

真係經典，個演員要講成分鐘架陰功！

除咗改劇本，佢仲掉咗啲場次既次序，真仆街，之前排咗啲轉景幾乎全部無用。當時我同佢講話剩番兩個禮拜冇時間改，佢一味話明，頂，明你又要改？你係咪癡線架？佢話今日會俾最新轉景啲圖我，終於收到，急不及待要同大家分享吓

講真係公司畫flowchart畫得多自問對圖既理解能力都有啲自信，不過呢啲鬼畫符，我真係睇唔明囉！可能係因為我係食緊飯唔係聞緊飯。。。

唉，尋日個個所謂 DRESSRUN，簡直不知所謂，Ｏ咀位多到數唔到，啲衫唔齊其實我預咗，只得個幾件睇吓。其中一件跳舞衫上身係一個金BRA，個服裝設計竟然用啲好硬既布邊位仲冇橡筋，我諗上到台走位兼走奶既機會應該好大，女演員半講笑咁話佢做到既野只係用乳貼摭住唔露點，唯有祝佢好運！

講番個DRESSRUN，都諗唔到可以爛成咁，啲戲好似冇執過咁﹝呢點唔關啲演員事，我可以做証人：導演真係從來冇執過戲，每一次排戲佢都講：『番轉頭』，『企過啲』，『係後面行唔好咁行』之類既廢話，演員完全唔似佢想要咩﹞，演員仲攞住個劇本嚟排，唔知著咩衫，仲有場戲啲演員suppose係唔著鞋，但係我竟然見到幾條荿利著晒鞋著咁死出唻，呀導演大人居然冇反應？真係睇到我眼火爆兼反白眼！！

走咗兩次核突DRESSRUN後，時間已經八點幾，我問導演大人跟住想點，佢竟然話想走多次，我當時真係想篤住佢塊面講：『你條仆街連演員著鞋出嚟都睇唔Ｘ到，仲想睇咩Ｘ野？』多謝香港政府提供既高深教育，我冇咁講，仲好溫柔地講：『不如你執戲呀？』當時佢即Ｏ咀，我諗佢心諗：『執戲？我唔識噃！？』好彩當時第一次嚟睇排戲既燈光設計都忍唔住話：『我都覺得你需要執戲！』你話幾樣衰！！

最後佢話咁執CHROUS，我心諗你有冇野呀嗎？啲主角啲戲核突成貢仲執CHROUS？不過我冇佢咁氣，即‧走！！！