當一樣野買到令自己肉痛時，最好的方法係用到佢盡。

基於這個想法，我竟然答應周先生與他的電單車朋友遊車河。嘩！你睇我大膽到何其唔似我的風格！

其實驚過頭我係會尖叫的，又或者用我的小指頭篤周先生的肚臍，這個方法相當有效！尤其在我做電單車乘客的時候，通常係會立即如我所願的，於是做周先生乘客呢！經己變得沒有甚麼太可怕的事發生。

但事情總有點例外....

在一個差不多十點幾的時候，在荃灣地鉄站左右。我被轉換了司機，一個我識左未夠五分鐘的人，成了我返屋企那段路的司機。哎！由荃灣出去太子，基本上係行高速公路。在思維上我就係疏忽了這一點，周先生己提醒了司機朋友勿轉彎轉得太急，又不要飛得太快，因為我啱啱學坐電單車。

由於司機係男仔，為免有投懷送抱之嫌，我只好扶住個椅邊坐定定就係啦，這個姿勢在上高速公路之前也可以的。豈料，上高速公路之後，司機先生就開始飛嘞，d風刮刮聲，說不出似係被打左幾多巴，有幾秒鐘時間直情覺得架車似在飛一樣，不知係有沙入眼定係風太大還是驚過頭，我竟然眼都濕濕地......

終於到達落斜後首個燈口位，那一刻！簡直有去死的感覺。據透露那位司機先生應該曾一度飛到貼近100m.....嘩！救命....我竟然撞到車神。

周先生經已用電單車代步了，如果唔想各自坐車出入的話，周先生說我最好擁有自己的頭盔，然後說日後不一定坐佢車坐別人車也方便。

在我尚有少少餘錢的時候，我惟有選擇一個合我的頭盔。我有留意過木村在beautiful life中那個電單車造型確係相當殺死人的，於是就根據這個概念挑選我第一個頭盔，原則當然要與身型合比例，簡單一句就係不要太累贅，但唔該設計及圖案簡單些，因為我不好別人在我頭上挑花又或者貼些甚麼人型卡通公仔，正所謂走型格路線的就無謂喺樹扮cutie。

旺角的車舖幾乎經己行完，好老實無一個合心水的......不是sm feel就係mk feel，再唔係就係d色或花紋出事...我揚言我係好白色的頭盔，但必需要係珍珠白，而唔係差佬白....這點相當重要。

終於在一間附近九龍城之類的舖頭，嘩！那裡有很多個不同款式的頭盔，單係牌子都有好多隻，有些頭盔更成四五千蚊一個，貴到呀！周生話那些頭盔會用好多年都得.....但我自問外型上係怕悶的一個人，怎捱得住呀！

終於我選到了我愛的珍珠白，一千零一個咁大把，當然愛不惜手。老實曾經考慮過皮款的頭盔，但奈何那個花唔知點解放落我個頭度似足落場玩攬球咁，想象到那個頭盔，要配二個橫膊頭，立即打了個突，還是選回珍珠白夠穩陣。

不示弱，為左統一"型"的特色，我配了副水銀鏡去襯佢，正所謂型呢下野係要有代價。在踏出舖頭嗰一刻，望一望個荷包，確實有嗱嗱聲的感覺。噢！好貴呢！肉痛...........

從來不覺得坐電單車是一件好型的事。那款電單車係型呢？那款頭盔是有款呢？思維未調較至欣賞階段，故此電單車一向與我絕緣。

由周先生學電單車開始，他就開始說服我電單車的好有abcdefg....咁多，佢要學電單車的理由也有hijklmno....咁多....
其實也沒有聽進去多少，只是條件反射地答no...唔好...唔係掛..唔駛啦...
卒之...還是...始終..到最後...周先生還是成功掛了個p仔牌....

也在不經不覺間，在我其實也有表達反對的情況下，從天而降地他半擁有了一輛電單車，於是他又再次舉出其實唔係好貴，用電單車好花算之類的5678個理由去說出，他將會守規地駕駛，最終也為了有天(將)可能鍛鍊出好身手，而我不過到最後還是會受慰之類的說話。

突然出現了這麼一天，在我返工的辦事處門口，在一個春光明媚的下午，在我肚子餓要去食飯之際，不知那裡來了多一個頭盔，說訓練一下我做電單車乘客的膽量，又說了自己這個男朋友很好很細心之類的說話，我就膽粗粗的作了第一次嘗試。

旅程大約不消十分鐘，我一坐上車開車之際pet pet就滑了下去頂住了周先生的pet，隨後佢話佢唔係開得快，但我卻感到涼滲滲，於是我開始瓜瓜叫，在dup車開車間頭盔就不斷撞呀撞咁，周先生說我像極了雞丁，笑說要買個紅色頭盔之類務求使我更入戲。

就不斷瓜瓜、boom boom地來到了食肆門外....我就扁扁咀腳挈挈地下了車.....以為事件應該告一段落嘞...豈料..

在放工的時段，周先生以無人同我踏車，及好趕時間去食飯為由，命我必需再次坐上電單車....這回..我精叻了盡量避免把pet pet滑下，但由於路途有不少高速公路，而摩打又不知怎的總是在震我的腳和pet，又痕又癢的，於是我開始郁郁下來避震，豈料被周先生以為我在玩花式....噢..my god

由香港仔到深水埗，一加速就震，震到pet也開始有點痺痺的...我嘩啦叫周先生在揾笨，他開始運用智慧地推說只要換了車就會沒有震震震這個問題了，我咪咪眼深明這個根本這是脆計！

推出智能身份証之後，我經己好在意幾時輪到我呢個age group去換身份証...終於等左幾年，由方力申同我地呢一輩講「輪到你換証」，這個安排好！起碼好過容祖兒叫我去換証(理由：個人情意結)

斯文就有嘞！但對前景充滿希望呢，就睇唔到。
頸都有嘞！沒有被斬頭。
黑眼圈呢就無嘞！但眼肚呢就仲見囉....
身份証清楚印著2006-4-13(我調轉了個六來看就係9413，絕！我配的..haha)
我刻意在領取身份証前，先拿舊那張拍張照好讓他朝對比，我係比以前順眼左，起碼個樣會無咁泥有d個性。

唉！失一個敗！

因為工作緣故，認識了幾個媽咪。當中有些「嫁得好」的；有些住公屋的；有些仔大女大但仍要捱的；有些子女剛在學的......

媽咪級，自然對子女、家庭、丈夫都各有見解。一向都只是看見、聽見她們的生活，甚少以朋友角度去聽「師奶感受」，今天面對她們的機會多了，也就自然聽多了。箇中或許未必認同他們的見解，但對一些作為女人的下半生來說，確實帶起我的興趣，未知他日我和她們的故仔會否一樣，但她們今天所面對的，如果忠於或受制於社會給予女性的責任而言，他們所說的實在相當現實。

※關於結婚
情到濃時當然無得講啦。但當一段關係未投入時，作為女仔如果又都打算一段關係固定咯，好應該唸下呢個男人可以帶到d咩生活俾你囉，如果今日要我再揀過，我唸我未必會揀我老公，好多野好現實的。做女人家庭係要負責的，但老公又未致於可以令你全面退落嚟，又要做野又要捱一個家庭確實唔係一件易事，如果可以舒服d點解唔揀啫 ？

※關於生仔女
生女舒服好多，責任亦唔會咁大。你生仔，你會在意埋個社會點睇佢？咁你自然花多d心機去培育佢，希望佢第日唔養得起人至少都唔好害左人地，所以做仔媽咪責任的確好大，有時唔係只係睇自己或者睇男家點睇佢的？你仲要計埋佢點樣出去做人的。但好老實，佢壞唔壞佢點做人做阿仔媽咪係好難控制的，你俾好多野佢嘞！你花晒所有去供佢嘞！咁又點？代表佢一定係有用的人麼......做阿媽其實好被動亦都無助，因為仔始終有日係會飛，你做好你的角色了，俾佢一個家的感覺但都未必會留得住佢......

※關於嫁得好
做阿媽自然想個女嫁得好，最好就能夠由佢改善埋我地屋企tim..做女能唔能夠喺男家屋企抬頭或制得到個老公，就好講求佢有無本事，有無命。但做阿媽的，就無得顧咁多，始終個女嫁個咩人都總要令屋企人抬到頭先得架，唔通仲要我地養埋人地個仔咩！

看著身邊的一對對朋友，都發現媽咪輩在明在暗其實都計緊呢條數，只不過當事人幾時先知啫？

因為試過跌到成隻煎堆的緣故，經己沒有踏單車很多年了。除了怕再一次變成煎堆之外，另一個原因是踏完單車手腳將會累得如同半殘廢一樣，於是就變成很久太久都沒有動力去建議做這件事。

今次有點例外，因為竟然是姐姐主動建議的，由於我倆技藝未精，為免雙雙衝落海，就找來周先生義務擔當「實Q」一日。

選日子去踏單車也大費心思的，首選天氣不要太熱；另外亦要預算將有充足日子休息才可放肆踏單車一次，可是為了遷就姐姐的緣故，終究還是在放假前一日才成事。

早於十時許我們便要出發了，始終復活節必定人多，為免最後空歡喜一場，當日就預早出發了。來到大圍一切都好像變了很多，首先單看車站....經己唔知點解好似突然變得大左同複雜左好多，記憶所及自從馬鞍山線通車都未坐過九鐵，那刻確有出城的感覺。

踏單車第一關：試車
老實說我真係唔知一架單車點樣試先係真，看單車就有如睇狗狗一樣合眼緣就得啦..對於我，但當然周先生不放心，取車後又試又跳又踩咁...我就當睇表演適當時候就發出哦哦聲同嘩嘩聲。

踏單車第二關：上車
其實係有點戰戰兢兢的，因為一上車那一刻其實當事人好清楚當日「老唔老黎」，尤其對於好耐都無踏單車的人來說，總覺得技術經己退化得很，上車那一刻就知自己係咪退化到零的階段。我的狀態當然是，一上車扭扭攞平衡感，然後pet pet又扭扭，若攞不到平衡感一開車就會遇人撞人；遇佛撞佛...豈料竟然順利pass....

踏單車第三關：轉彎+避人
根據學車回憶錄，我轉彎係咁的......首先在轉彎位dup停架車，然後伸出腳仔踏地，提起pet pet企直個人，然後隻手順勢就邊推架車個人邊脾挈挈咁行嘞，那種姿勢實在係樣衰+低能，但為求安全，我都係會照做的；至於避人，我通常會大叫又或者扭軚然後撞落路邊的。但今天這些事情統統都沒有發生在我身上，相反就發生了在我姐姐身上.....周先生說我升班嘞....踏單車都算精叻可以同埋佢的朋友仔玩喎(下次)

就係咁...慢慢踏呀踏(要就我姐姐速度)，用了快將二個幾鐘先去到大埔，又用左快將二個幾鐘返返嚟，結果整日就用左差不多六至七小時踏單車，回到家對腳可謂震過貓王，那種赤痛在我生平裡應該除左上回去西安行華山之後的第二次咁體驗，可憐我的pet pet二個橙麻痺得很....周先生話係我不懂得企高卸返d上落位，所以pet pet遭殃喎。

為此我決定哀悼pet pet...阿門

煩惱的事情..........
多！

要思考的事情.........
更多！

一下間很多盒子打開了.......
我抱著頭發呆！

今天是兒童節.......明天是清明節.........下星期是復活節.....
是否經己是一個明示.....

一星期放假，原來可以無需特定甚麼時間表，已夠充實。
一星期放假，原來毋須太過張揚，因為隨心隨意一個星期實在太少。

平時返工經己用腦，故此可以的話我比較喜歡唔計唔plan...這個星期可謂充份滿足了我的自由行。在此，真的要記記我很久沒有幹過的事情..........

i)上班時份，可優悠地逛逛我的跑馬地，幻想自己是闊太、是二 奶、是藝術家、是練馬師............
ii)在穿珠店想穿製甚麼，就拿起樣版穿呀穿學師奶講是非....
iii)帶著狗狗上山下海...(我懷疑是訓練我居多，佢應該係陪客)
iv)為配搭畫框，與老闆說這說那當學手藝....
v)在朋友家睡覺(這點太值得一提，因為我好像中學以後都無咁做過嘞...理由係怕自己睡覺樣見不得人...帶日用品好煩像是走難...還有睡覺小習慣.....太多太多不能盡錄)
vi)冰凍迪迪尼之旅
vii)與周先生煮飯買菜...做笨豬、做師奶、先點點周先生、再閒時讓他點點我.........

一星期原來可以做好多事...
一星期原來可以容納咁多未試過...
開心的一星期原來太少..........