好記得三年前o係維園撐fd出show時睇過一隊女子band，一隊好有火既女子band，好Punk既曲式，又有少少Grunge，真係好鍾意。之後自己搞既band show都有邀請過佢地出show。本來呢篇日記唔應該o係今日寫，因為o係佢地05年8月既CD Release Party時已經覺得當年既火好似熄咗一大半…佢地再唔係三年前我所愛既band。今日寫返呢篇野係由於上星期五返工，佢地既唱片公司同我地合作，所以就好順理成章咁要入佢地D歌。隔咗年半，再聽佢地既歌，依然係比水淋熄咗既少少火種…三年前既記憶再次湧出嚟……唔止關於佢地，仲有三年前既我、未入IVE既我、未學識戴面具既我……所有事好似係好遙遠既事，但又好似只係尋日發生咁……好想好想做返十五、六歲既我，無憂無慮既我………

之前既文章提過，我好怕D成咗名既朋友，我相信問題出於自己身上而多於佢地有問題。

因為Vicky極度推薦，加上有朋友入咗叱o宅，所以就去捧一捧場。見到佢地攞唔到獎o個一刻，個心竟然好衰咁鬆咗一口氣…I know it's great that they became famous，但我就係過唔到自己o個關，自己總會第一時間隔道牆o係中間…

好記得o個日抱住陸Sir，喊住同佢講：「你地唔好一出名就唔識人呀。」陸Sir亦攬住我同我講：「我應承你，我地一定唔會囂。」我知道佢地依然係以前既佢地，佢地一直無變，變既只不過係我…

希望以後我可以對人有更大信心……

不嬲對香港樂壇既頒獎禮無乜興趣，因為呢個只係一個商業遊戲。唔同小學中學，攞學業獎係實至名歸；出到社會，頒獎禮，只係一個俾面派對，其實歌手成績點，明眼人睇到，唔需要搞咁多野。

今日聽咗兩隻新CD，覺得香港某D唱片公司真係唔知咩叫音樂，咩叫道德。

一隻八月先出過既CD，竟然可以巧立名目咁於上星期重新出多一次！呢隻所謂既「特別版」只不過係比原碟多一首新歌同一首爛鬼remix！MV都只係多咗兩隻，但價錢反而賣得比原碟貴！

另一隻情侶檔CD，全碟得兩首係新歌，其他都係翻唱人地既歌。唔該你啦！嗰兩隻野唱功又唔係出色，甚至唔算得上好聽，唱片公司為咗慳埋D作曲作詞費，就推呢兩個人出去死，出得咁無誠意，咁辛苦出嚟為乜？！

一D細唱片公司/獨立音樂人因為經費問題而無辦法為自己做宣傳，但佢地依然忠於自己做好音樂；但反觀呢兩間唱片公司，有錢做埋D咁既垃圾，倒不如將呢D錢捐比有需要既人嚟幫自己積下陰德啦！！

由於台灣地震震爆咗六條海底光纖電纜，搞到個個好似活死人咁，行屍走肉，望住部腦，睇得唔用得…

我呢D寫開blog既人，突然上唔到yahoo blog、又上唔到xanga，無寫兩日blog，就好似兩日無沖涼咁，周身唔聚財…我係一個典型既雙子座人，最鍾意五時花六時變，適逢最近覺得yahoo blog太單調，想轉第二個blog嚟用下，所以就再次重投hompy既懷抱。

不過o係得hompy寫blog，就預咗唔可以再大大聲咁講硬's壞話…惟有去另一度開新blog專門鬧臭佢啦~~

有一朝瞓到夢鬆鬆,聽到收音機播緊首歌既Vocal勁似PixelToy Candy把聲(我習慣開住收音機瞓覺),但D曲式又勁accoustic、得一粒半粒電子音,就展開咗個估歌仔遊戲,但諗嚟諗去都諗唔到有邊個Artist把聲會似Candy把聲,最後DJ開估咗：係PixelToy既〈寫一首詩〉。

我都幾怕望住自己識既音樂人由「地下」升上「地面」,尤其是自己鍾意嗰D...

想當年係比Candy把聲吸引先會開始鍾意PixelToy,記得當年佢地喺上環文娛玩嗰陣,Candy唱到一半,音樂突然停咗,佢就望一望何山,講咗幾句,然後Candy尷尷尬尬笑住咁話：「Sorry呀,部電腦hang機,等一等我地再嚟多一次丫~」

好似張繼聰咁,以前望住佢喺漫畫節既band competition做表演嘉賓唱〈慾望號街車〉、喺維園既FARM表演...我仲好記得佢走過嚟同我講：「喂~D歌好唔好聽呀? 遲D我會係歌手嚟架! 記住買我隻碟呀!!」

當自己鍾意既音樂人無啦啦「升級」後,就會突然有一班妹妹仔撞開你去尖叫狂呼、大嗌XX好靚仔、YY好可愛...我最怕就係呢D情況...

有一隊band,以前成日睇佢地出show、揾佢地出show,大家有講有笑,但一「升級」後,竟然用「偶像笑容」嚟望你...嗰種感覺真係......

我個friend話：「你都變態既,唔鍾意人地出道都有既!」
佢地出道就固之然係好事啦,起碼代表香港「樂壇」都仲有少少希望,但要我好似喺佢地未出道前咁追show就無謂啦...我老啦,唔想同D妹妹仔鬥撞......我得閒買隻CD,或者喺電視機前YO兩下就滿足架啦~

我好鍾意睇Live,一來鍾意聽D人走音；二來D唱片公司成日話咩「爆靚女聲X叉Y」,但我習慣聽完佢D Live,先再考慮買CD嚟聽。

好似啱啱睇完某節目中軟淇既〈世間始終你好〉、U Meet毛+關心人既〈幸運是我〉,一聽就知邊個識唱歌；邊個唔識唱歌。其實無線應該編U Meet毛同軟淇一齊合唱嘛,兩把豆沙喉應該會比較容易和音囉~

我想再不厭其煩咁講多次,歌手係應該識唱歌、識聲樂,D「歌手」成講咩「我好比心機去唱」、「我真係好鍾意唱歌」等等既廢話,冇用架!! K房常客阿珍都好比心機去唱歌,隔離屋既三姑姐都好鍾意唱歌,不如捧佢地吖笨~~理想唔同現實,你好鍾意唱歌,但天生一副豆沙喉,Singer=歌唱家=懂得唱歌既人,我唔係話豆沙喉冇權唱歌,但麻煩唔好企出嚟污染聽眾既耳朵吖,鍾意唱歌既話,入K房自己唱飽佢啦~~

今日幫學校拍「青少年機械人中國選拔賽」,參賽者方面有來自澳門、上海、北京既中學生；嘉賓方面又有中國人大代表、澳門乜乜官員,但個司儀竟然係唔識講普通話囉!! 慘在佢仲要爆肚懶幽默添喎!! 培道(pei dao)讀成培都 (pei do)、季軍(ji jun)讀成龜軍(gui jun)...我後面嗰兩個普通話人笑到趴咗喺度......

我認為香港人一定要識講普通話,我並唔係嗰D大嗌香港人=中國人=一定要識講普通話既人,我甚至唔覺得自己係中國人。但我地作為國際大都會既市民,兩文三語係基本Must一定要識囉。就算唔講咩中國人、國際大都會,作為一間中國機構既職員,喺一個機械人中國選拔賽中擔任MC,我覺得一定要盡自己本份去做,我唔信佢準備充足後都依然係讀成咁囉。

丟盡哂香港人既假!!!