大家好，冰冰媽現在正忙於將我個網誌搬遷當中，所以up-date時間會較慢，而且個電腦成日short short地，搞到搬屋的進度都慢了不少，新網誌連結如下：http://hk.myblog.yahoo.com/sylokping/

冰媽媽實在抵打，竟然過了這麼久才同我寫日誌，這也難怪佢，因為近排冰媽媽迷上了煮野食，日煮夜煮，煮到家中都添置了不少器材，加上佢工作呢排太多野煩，所以搞到佢都冇時間寫野，至於乜解究個標題叫「受傷了」，係因為前日我一早起身時竟然跳唔起，嚇得冰爸媽即時帶我睇醫生，冰爸爸仲即刻請假照顧我，而冰媽媽就請昨天的假照顧我，其實唔洗一日我就冇乜事，只係冰爸媽覺得以前成日跳跳紮0既我，突然間跳唔起，佢地就梗係好擔心，當然其他人知道我個病況時就例必指責冰媽媽唔同我減肥，搞到冰媽媽要死撐，因為佢唔幫我撐我就真係要節食了，好彩我唔洗一天又食得跳得，不過冰媽媽都開始密謀同我節下食，等我唔好有日真係因為太重磅而跳唔起。

正過鮑魚X同冠X臘腸的玉照多多聲呢，起碼老少咸宜，而且冰冰豬是真的很天真同很傻呢!

鼠年祝大家身體健康，個個都賺大錢，男的英俊型仔，女的青春常駐，大家都過得開心快樂，特別是冰爺爺可以早日康復啦!

各位見我呢張新年照係唔係好正呢，其實之前冰爸媽帶我去了影沙龍，當日因為臨近新年，所以攝影師就同我影定一輯新年相，不過我就好麻煩，成日都要走人，搞到攝影師同冰媽媽要出盡法寶等我乖乖望鏡呢。

當然只要有零食的誘惑，你想叫我望邊我就會望邊啦，而冰爸媽最鍾意就莫過於拍我大頭狗的樣子，因為平日佢哋影極都影唔似，今次一口氣可以拍攝多張大頭狗相片，冰爸媽就感到好鬼高興，講真，張相真係拍得好鬼得意呢!!!!!

又到一年一度打針針的大日子，早前冰爸媽齊齊放假同我做檢查兼打針針，好彩個日天氣唔算好凍，所以我都唔洗着衫衫，仲熱到我勁透氣呢，不過都唔夠呢位朋友仔犀利，佢熱到成間診所都聽到佢把透氣聲呢!而係我等緊期間，冰爸爸就全程抱住我，而冰媽媽就狂影我個緊張樣，鬼叫我知道要打針針咩，人地會驚痛架!好彩醫生手勢好好，我打針針時都冇話覺痛，不過阿醫生就好怕羞，當冰媽媽影相相時，佢即刻彈開，搞到冰媽媽幾唔好意思呢!

冰媽媽真係好鬼懶，加上工作忙同掛住煮嘢食關係，搞到佢成日都冇同update個blog，最衰都係佢早排去工展會買左個光波爐啦，就係呢個物體，因為呢個爐聲稱可以代替幾種煮食家電，所以冰媽媽就即刻扑鎚買左個爐，佢仲即時為我炮製愛心曲奇，不過第一次整曲奇嘅冰媽媽就慘告失敗，由於啲粉太多水關係，令到啲曲奇變成一堆堆，又厚又唔脆，賣相仲認真麻麻添，好彩冰媽媽之後炮製嘅焗雞條就好好多，起碼冇難度，點整都唔會失手啦!

祝各位靚仔靚女、狗仔狗女、狗朋親友.......聖誕快樂!