各位好友,我要走喇,真係好唔捨得呢度,因為好靚>.<不過行得太慢喇,又唔可以放得多相,所以要走喇

各方好友,請繼續來新地頭找我呀>.<

快d來報到http://cid-1f9af5aee470e7c6.spaces.live.com/

我都好想add你,但係....我無你msn喎@@~~不如你add我丫~~

sukiarster@hotmail.com

本來好開心,難得抽到《KERORO軍曹大電影3之天空大作戰》優先場戲飛2張,一早知道係星期六睇,所以都知自己去唔到,但係見咁早攪抽飛,諗到早d收到可以send比媽咪,睇下邊個可以代我帶杰杰去睇,點知今日都未收到,睇怕都係聽日先收到啦,好啦,諗到叫細佬同杰杰去睇,點知聽日生日會......唉~~~天意弄意人呀>.<~~~

呢幾日好熱呀~~我以為晒黑左好多啦,點知拍埋桐桐度,先發覺桐桐晒到好黑呀,塊面仲晒到一忽忽tim~~,雖然係咁,佢依然好靚女^^~~原來黑黑地都幾match佢架喎~~不過唔得呀~9月有人mark左佢做花女喎~唔黑得架,所以呢幾日都同佢揸埋防晒~~咁細個就要咁~咁日後買護膚品咪好貴~~~???

日子好似愈來愈過得快...ivy妹妹去左日本旅行,好羨慕呀....其實我都有諗過去玩下,但係真係放唔低呢2隻小魔怪咁多日呢~~原來老公都好想去旅行..佢問我想去邊度玩,比我,我會再去多次韓國玩...雖然係去過一次,但係過得好豐富...玩得好開心....以前我都會選擇去日本玩,但係而家覺得日本只係去shopping,無乜景點吸引我~~~人一世物一世,都係要去見識下既~~~~

過左咁多日,舖頭生意都未回復,仲係好差好差.....日子都變得好難過....今日幫杰杰報左d暑期活動班,等佢過得充實d啦~~^^

今日叫做正式通車喇....請問有幾多人夠胆坐呢???山坡都未做好,又偷左底,話就話安全,但係都心有餘悸law~~某車長同我地講,話黑雨早上6點,佢開得慢d都死得人多.........

我地果邊d工程可以話做左一半喇,但係村口仲係未入到,佢地期望係天氣好的呢幾日可以噴漿,希望可以啦~~舖頭生意依然係咁差,緊係啦,傳謀大力宣傳,南涌封村丫ma~~死未...好彩都有d訂左既旅行團會照常過來...好多人見到我地都會問開返未...其實都無close過...-.-""無奈到爆.....抖左好多日喇,好悶呀~~日日都係做2轉,中午做工人,晚上做老師,中間時間on居居/.\

係星期五,6299決定左星期六同日都唔開,你知啦,邊有人入來食飯丫~~所以,我真係滿心期待星期六可以休息出香港....咁岩,星期六早上,我地住果邊南涌松山無左電....無水就話難過少少啫,無電點過呀???好彩休息...受左上次教訓,今次出去,係window shopping,真係好忍手,完全無買過野,但係都洗左1300左右,另外eps左$450買PS3既龍珠GAME...其實買左部PS3咁耐,都無買過碟,淨係問人借GAME打,咁買來做咩??而家大致決定每月出糧都買一隻GAME,當然,要有興趣先買啦^^..

記得對上一次睇戲,係變形金鋼,仲要係收工飛車出東涌睇,睇完又飛車返大澳,今次,好開心,可以睇到想睇既戲,又唔趕,睇左破天.慌...雖然好似無厘頭左少少,內容比想像中無奈左D,但係驚嚇方面都幾好,音響都幾正,呢D戲始終都要去戲院睇先好FEEL....

期待以久既星期日終於到喇....係我嫁左呢5年以來都未試過星期日休息,以前星期日會一家人相聚,飲下茶,傾下計.....以前唔識珍惜,成日覺得好悶,而家真係要好難得先會有呢一日..就係呢次山泥傾瀉送比我既...表弟個女,已經3歲喇,今日係我第一次見到佢,好得意,好乖,仲好痴我同老公tim~~情願跟我都唔要佢爺爺,呢d小朋友幾好,唔怕陌生,又nice~~好cute呀>.<最衰唔記得帶相機,好想同佢影相呢~~原來佢好鐘意杰杰同桐桐玩架,可能平時無小朋友同佢玩啦~~哈哈~~今日第一次有人叫我做表姑婆咋~~好似好老咁~~~今日,真係好開心,好耐都無試過咁warm喇.....

晚上同6299同埋姑仔果邊準親家食飯,都幾開心,可惜係要趕船,6點食飯8點前走人,由於姑仔未返大澳,所以接左桐桐同佢一齊住幾日,走時桐桐成日叫我唔好留低佢,攪到我都心up up咁,好似好慘咁..e~~好似好衰呀~~不過姑仔好錫佢,桐桐都好跟佢,唔洗担心^^

杰杰今晚係第一次坐呢d天星小輪feel既船,好慢呀~~成個鐘先返到入大澳,但係海風吹埋黎好舒服^^

無辨法形容有水黎既心情...係呢4日以來,無得洗衫,因為d水都係飲用;勉強沖涼,除左一定要幫小朋友沖涼外,我同老公都用好少水沖涼,甚至乎老公要到山澗沖涼,亦因此病病地,而我都4日無洗頭>.<(我係長頭髮架);食完野既器皿都係放埋一邊,無得洗;去廁所無得沖廁,要儲埋先一次過用d用過既水沖...無水,真係好無奈....當昨晚有水時,真係開心到不得了,嗱嗱聲開水喉,過左d黃泥水,洗下個廁所,晚黑就舒舒服服咁沖個涼,洗埋頭,洗下面....^^v

昨日開居民大會,大澳有個住左不足2成人既屋苑都唔開放出來比人暫住,竟然叫人出東涌暫住....唔係人人都可以一下子收好野就出去住架ma~有大有細,咁多行李,唔通一落雨就執野出東涌,無雨就返大澳咩???好心開放個屋苑啦,又唔係長住....真係頂丫....一d都無問清楚災民意願,一意孤行......好彩都有人做下野,而家都叫做開放左幾戶,睇下有無人需要住law~~而我地就要留守大本營喇...除非真係仲有大雨啦,如果唔係,都唔會過去架喇....

媽咪,爸爸...各位親友,大家放心啦,我地成家都同心合力,都好留意身邊d野,所以唔洗担心我地架喇,我地會好小心.....

其實我覺得大澳呢次有事,唔係無人理law~d人炮轟政府做野慢,唔理我地,我覺得唔係law~好似羌山果d,寶蓮寺果d,大澳叫做有人做野架喇,但係人既力量係有限,好似早幾日有80民安隊入黎做野,係好多人咁喎,點知清有一個下午,都仲係好多泥石,收工之後就無再返南涌喇,做乜咁多人做野都咁慢呢?大佬,人手咋,無機器點做喎....之後無再入來,原來係有好多地方比我地更需要佢地幫手,所以政府都外判左比人做,不過無電台入來影啫....另外水果方面,成日話今晚有今晚有,點知都係無,d人又嘈喇..但係我地呢d睇住水務處做野既,真係無見佢地停低手law~係不停咁修理,只不過係,做完評估有問題果邊之後,原來另一邊都比大水沖斷左,當做完後,原來又有問題..所以我無怨過.....只係覺得好多時,政府係後知後覺,每每要有事發生先做野,好少話一早預防law~

多謝曾局長and民安隊.....今日終於都有政府人員來幫忙清理....天氣報告話過2日會有大雨,如果無民安隊來幫忙,相信單憑舖頭幾位男工清理,過埋雨季都未攪掂....多謝傳媒,因為佢地既廣播,令到南涌可以咁快有政府人員來磡察.....多謝呢場大雨,可以令我地知道邊個係人,邊個係鬼-.-.....

老公今日去左影相,你可以睇到相中,果個位置,就係上山拜山果度喇...見唔見到條梯呢???本來條梯邊就係樹叢,多得某d樹,可以hold住d大石,如果相中見到既大石跌埋落黎,真係唔敢想像.....今日,曾生話比我地知,我地住緊既地方,係非常危險,因為再有大雨的話,會再有山泥傾瀉既危機....可以去邊呢??

今日依然無水,真係開始有少少慣喇,由於怕山水有阿米巴,所以都係學人去輪水啦...將d食水煮熟,有少少怪味...飲完疑住有少少肚痛....原來咁樣都未算苦,深屈連電都無.....記得上年雨季,打個雷就連電都無埋,又熱又焗,乜都睇唔到,開著電筒照住開奶,用雜誌幫小孩抖涼,真係好似好淒涼咁....所以,都算明白無電既滋味.....就係因為怕無電,呢幾日我都幫4部電筒儲好電,以備不時之需....

其實都有少少想出返香港,因為真係幾難頂呢~~~呢個算唔算係難得既假期呢????