早排返去覆診, 真係唔駛再食藥, 都唔駛再覆診喇. 遲啲如果有其他生活嘅變化先可能要返去搵醫生. 我開心到即刻買咗一堆雪糕返去請同事食呀!  

公司終於响星期六搬咗喇, 執咗我三晚十一點幾. 都唔記得清楚有幾多箱嘢喇. 自己兩個位大約十令箱, 我名下公家嘢十令箱, 入倉十箱. 尋日返到去打仗咁咖, 要周圍搵返自己啲箱. 都算叫做七七八八啦, 聽日返到去人哋仲要搵緊嘢, 我哋就可以爆箱啦. 夜晚 '派翠克' 仲會請我哋食入伙飯潻!  

除咗做維修外, 仲要處理埋投訴. 人事事件. 唔知點解啲人好鍾意嚟同我講是非, 有問題就實係嚟同我講喎. M部門AM覺得佢部門某人做嘢有問題, 佢自己係唔會同佢講喎. 係會同我講 ' Sammao, 亞邊個邊個咁做係唔掂咖, 你同佢有兩句, 你幫我同佢傾下啦.' 跟住亞邊個邊個又會同我講AM有心針對佢唔知點算好. 兩個唔係捉住我傾, 就係打電話同我講, 有兩個禮拜係完全做唔到嘢, 我要走去同佢哋主管投訴. 最終係亞邊個邊個選擇退出, 都走咗兩個禮拜喇. 我就覺得佢係好傻, 因為AM真係針對佢. 但火星水星又點可以共存吖. 唔好再攪到我呢個地球小姐啦. 另外, '叻叻' 幾十歲人都唔化咖. 明明知啲嘢唔係我俾佢, 佢會嚟問我, 有問題又會投訴喎. 啲同事有嘢唔合佢意又會嚟同我講喎. 大叔呀, 你同老細講啦. 我唔知, 我幫唔到你咖!! 又唔明點解, 啲嘢個個月都係咁做, 但有啲人永遠都唔記得, 差不多到時到候都唔會識自動自覺做喎. 我又忍唔住要出聲, 因為會影響到我嘛. 上至老細下至亞叔, 硬係有嘢漏. 真係攞命!!! 

又一個月喇, 呢個月做咗嘜呢 ? 都係清下啲舊嘢, 每日處理下其他 '雜務'. 而 '雜務' 係嘜呢 ? 就係公司所有影印機, printer 嘅緊急維修. 事關公司所有嘅機都係高用量嘅, 有時都等唔到 call service 嚟整. 而比較有關嘅同事大部份時間都要出咗街做嘢. 留响公司嗰位 '大少' 係唔會做呢啲嘢嘅. 公司大部份嘅男同事都係機械/器白痴. 特別係通常整壞啲機嗰兩個, 兩個都唔會出聲話你知喎. 到你行埋去用就知喇.  一號 '東尼叔' 整壞部機一定唔出聲, 但永遠留底一疊佢印咗出嚟有佢個大名嘅宣傳單張. 你係米白痴呀! 二號 '亞域' 佢之前都係會不顧而去呀! 不過俾我幾次當場捉到佢就以後都唔敢喇. 我唔係要求你整好佢, 但起碼要出聲, 好等我哋 call 人整嘛. 但宜家仲死，佢 jam 咗紙佢會去試圖整喎. 我通常都叫佢唔駛整咖，明知佢唔識啦．但佢都會堅持喎．咁米由佢試囉．經過佢一輪十五分鐘噪音後都係唔成功，但都係唔會話你知佢失敗咗喎．咁呢個時候我就會斯斯然行埋去用兩分鐘就會攪掂．有時明明係好簡單 jam 紙，攞番出嚟就 ok．但唔知點解佢會攪到張紙斷晒，變晒風琴總之塞死晒部機．唉！好彩我宜家都已經識拆咗部機整喇．呢個都係我轉嚟做嘅一個得著．

另一樣嘢, 就係公司要搬喇. 唉, 有排忙呀 ! 又要做好晒 d 嘢, 做埋 filing. 得我一個人做, 點攪呀 ?! 好彩我爭取到個 part time, 咁佢就幫我做每日嘅嘢, 我就可以清啲舊嘢喇 ! 好好彩佢仲好醒喎, 某君錯嘅嘢, 佢一樣都無錯過. 仲要有啲我係無教過佢喎. 我幾興奮呀 !  除咗呢啲嘢, 自己又有啲其他嘢要忙,  所以真係好唔得閒呀 !

成個月無 update 喇. 呢個月做過嘜呢 ? 去醫生度覆診, 佢就話我都好似幾好喇, 唔駛再食藥. 過多兩個月先再覆診睇下情況. 可以唔食藥就梗係唔食啦. 但好晴天霹靂呀, 我唔見咗啲醫院單呀, 陰公 ! 仲要搵時間去醫院攪番掂佢呀 ! 另一方面, 公司係忙到爆, 除咗係每日要做嘅嘢. 就係要執某君啲手尾. 頂 ! 做咗成半年都仲係 '重複犯錯' . 我放假嗰幾日, 佢幫我做嘅嘢日日都有嘢錯. 同亞 sir 講都無可奈何. 唔該你啦, 炒咗佢啦 ! 好彩公司嘅 '人氣產品' 唔係我跟啫. 唔係就死都唔掂 !  

放完假都一個禮拜喇, 但都未得閒執下啲嘢. 今次假期係去咗東京呀, 最主要係東京, 有一朝就去咗橫濱麵包超人館朝聖. 有一日就去咗廸士尼海洋, 因為對上次去廸士尼, 海洋啱啱差一個禮拜先開呀!  幾年後終於有機會去喇!  其餘大部份時間都係飲飲食食, 同去夾公仔囉. 但由於係自由行, 所以可以瞓夠先出去行街. 真係幾自由喎~~   

開始放假喇，無電腦唔駛心掛掛要 check email, facebook . 安心放假玩到盡. 幾日後見喇!