但願再見時不要說再見

開學之後就好忙，每日忙忙忙，唔駛返學個晚可以10點未夠就訓覺，有時亞海仲係體育會做緊GYM我已經打比佢話訓覺，所以連係MSN傾幾句都無。依家一、三、五我地其中一個要返學，二、四佢又要做GYM，所以開學後就真係各有各忙啦！

今個星期六佢一早又返左學校做野，下晝又要做GYM，如果唔係佢同我食一餐晚飯，我地跟本無時間去街見下面，因為今日我又要開家長會 ，佢又去左遊船河，之後又要重覆一個星期既忙碌生活，真係慘！

尋晚雖然只係同亞海食一餐飯，但都好開心！佢上黎屋企接我，落去食完飯之後，我地去左豐澤睇電視機，睇來睇去，終於買左部42吋既 Plasma，之後行左一陣就返屋企睇碟！睇到成1點佢先走！

亞海係度上網既時候，我就躺在床上發呆，我係度諗：呢排我地兩個一齊去籌備將來個間屋，一齊去商量一d野，我覺得要咁樣兩個人一齊先有意思，如果無另一半去過下半世，感覺一定好孤獨。

尋晚食飯既時候，你成日定左咁望住我，究竟你係度諗緊咩？可唔可以講比我知？

尋晚睇vcd既時候，你無端端錫我一下，究竟咩感覺令你突然之間會有咁既反應？可唔可以講比我知？

尋晚亞海同我講佢有個舊同學話結婚，後黎結唔成，係因為個男仔遇返以前舊女友，我聽到之後真係覺得有d恐怖，怕左咁耐拖，去到大家決定要結婚，感情應該相當唔錯，亦應該大家都視對方為將來一起生活既另一伴架啦！但點解另一個人既出現，竟然令自己話走就走，我真係唔明，如果依家可以一齊既，咁點解當初要分手.....感情原來真係好脆弱的。我問亞海佢會唔會咁，佢竟然答唔知，之後話唔會掛，點解d答案咁唔肯定既。我話點解好似唔係好肯定咁既，之後佢先話唔會。

你知嗎？兩個人一齊除左要比信心對方之外，我覺得都要比到信心自己，好似我表妹結婚個日，佢兩個講既說話，我覺得感動，係因為我覺得佢地對呢段婚姻都有信心，有信心白頭到老。雖然，呢個世界承諾還承諾，現實又歸現實，但如果連呢個目標都無既，將來一定唔會有好結果。

我希望我同你都可以有信心永遠係埋一齊啊！:em_48

今日係我最好既靚表妹結婚，原本應承左佢早d去幫佢既，但唔知做咩尋晚4點幾胃痛，痛到今日3點幾，食左兩粒藥，訓左一陣先無事，所以都無早早去到，真係有d過意不去！

睇返佢地以前d相，我發現我地雖然少見，但真係一齊長大，睇住大家踏入人生每一個階段，感覺有d奇怪！聽佢地講野既時候，我都有少少感動的，比我既感覺係佢地好有信心可以永遠一齊，仲話自己一定會白頭到老，我相信佢地一定會的

佢祝全場嘉賓幸福快樂，其實係我心裏面都係咁祝福佢，希望frankie永遠都咁錫佢！

不過，今日細佬講左比我知佢同亞慈既事之後，我都好唔開心！每次見到佢咁我都好心痛的，我知佢都係死撐下去的，係我地面前可以點，我同佢講無論點都好，都要向前行，唔好浪費自己太多時間！佢係我唯一一個細佬，亦係我最錫既細佬，我好希望佢可以開開心心生活，希望佢可以快d好返！我知佢大個仔，都識諗架啦，可能只係需要d時間姐,,希望呢段時間短，而且好快過去

我地飲完表妹個餐喜酒之後，亞海黎車我返屋企。原本我話唔好架啦！因為怕佢唔識路，又怕佢累，但佢好似好有誠意咁，所以我同細妹就係酒店大堂等佢啦！返到屋企我同佢係msn講，佢今晚對我咁好，佢問我有無分加，當然有啦！佢想知而家有幾多分，我無講比佢知，我覺得呢個係秘密！我話我一直都唔知自己有幾多分，佢話無限，不過個肚腩要扣少少分，下咁都得，我自問真係減唔到啊！

今日返小一適應課程之後要上成長的天空工作坊，其實個個工作坊一d都唔悶，不過要做好多活動，玩完第二個遊戲之後，我隻腳好似斷左咁，痛死我！

尋日同亞海上去律師樓簽文件後，經過一間ok，佢睇仲左買可樂換個件衫，所以諗住買4枝可樂換個件衫，但點知無男裝，所以佢買左件女裝比我；佢話去第二間ok買件男裝，我話好呀，等佢買左之後一齊著。夜晚佢放學之後打比我，話係佢屋企樓下個間ok買到一件男裝，好似好開心咁！咁我地可以一齊著啦！因為其實男女裝並唔係完全一樣的，咁一齊著都唔會太核突啦！

今日我要返工啊！因為係小一新生適應課程，要同d一仔上堂！

唔~整體黎講，d男仔既樣得意d，不過亦都多咀d，今日第一日，就放佢地一馬，遲d佢地再變本加厲時佢地就知味道了..哈哈 我仲選左個靚仔醒目班長添！Zoe上完堂上黎之後，話佢地都OK得意，連邊個多咀唔乖佢都已經掌握晒，真係勁！

放左學之後，發現4個MISS CALL，其中兩個係亞海同佢媽咪！覆返亞海先，因為今日要上律師樓，唔知佢改左幾點，打比佢，佢話約左12:30，哇..咁趕既！所以收左線執下檯面D野就走啦！之後再打返比佢媽咪，原來佢話比我知佢去左匯豐銀行幫我地估價，仲拎左D資料，又教我有咩可以同銀行講價，叫我地小心D揀喎。

落到元朗就同亞海上左律師樓，間律師樓裏面亂得好緊要，連亞海都話亂，可想而知個情況係幾咁惡劣！簽完所有野之後，我地就走，然後去食野啦！我話比佢知佢亞媽打過比我，佢原來聽到我地講電話，不過佢唔知佢亞媽打過比我，仲猛話佢亞媽當左我係佢個女，咁我同佢亞媽有傾有講唔好咩？!佢應該開心至係啦！

之後，佢返學校開會，我就約左媽咪去銀行，然後回家做野！

剛剛過去左既一個週未同週日我都好開心啊！

星期六約左渣打銀行個個sales，之前諗住去恆生交埋我地之前欠既文件先，所以約左亞海11點在元朗等，但佢"咪咪摩摩"，我地11點幾先去到！

攪掂銀行d野之後，我地去左食野，食完就返左上屋企。攤係屋企，我地係度話買左樓之後，逢星期六日既活動就係咁，盡量唔好出街，唔開冷氣，唔好活動，避免消耗身體既energy而要食野，愈講愈誇張，笑死！之後我地上網買飛睇「日本沉末」,套戲比我想像中無咁刺激，諗住好多震撼既場面架嘛，但原來都唔係！亞海話耗資左唔知二千萬去拍喎，咁我相信係日本既電影黎講，應該都係大製作。真係好，佢原來都去戲院睇戲的~~~

睇完戲之後，我地返左佢屋企食飯，因為應承左佢亞媽呢兩日是旦一日搵佢，返到去，佢亞爸亞媽都準備好晒，只係等我地，真係唔好意思。

夜晚，義仔又呼召我地去黎仔屋企，但後黎由於小莊失蹤所以取消，不過我即使去都唔玩得夜啦！因為我星期日要返工啊！10點到亞海就車我返屋企啦！

之後我地係msn傾左一陣，佢話聽朝同我食早餐啊！點解咁好既，第二日係星期日喎，我返9點，佢仲要7點幾起身揸車落黎元朗同我食早餐，然後車我返學校！ 我仲以為呢個優待已經無左添，算佢都仲有我dd心

我返工，佢就去左做gym，放工之後，我地一齊食野，然後租碟係屋企睇，睇「鬼魅山房」，有d鏡頭都幾核突同恐怖，亞海見到我縮埋一舊就攬住我！好sweet啊！呵呵！

 直到夜晚，佢係度食埋飯，我地上網睇下車，睇下d電視機，不知不覺已經成11點，佢都走啦！

雖然呢兩日唔係做咩特別野，但我都好開心！