決定了

從今以後把網上日記搬回老家

感謝各位朋友一直以來的支持

日後若是掛念阿咪的

請到以下日記探訪

阿咪紀念館SITELALA~文字版日記

阿咪歷史舞台YAHOO BLOG~聲音版日記

老爸今日終於的起心肝去搵工，比佢搵到份工，響士美菲路頂做管理員，登記下d人呀d車呀出出入入，朝七晚七，不過其實都係冇乜野做架者！人工就當然好少啦！少過佢以前做會計佬起碼少左三份二人工呀！！！

不過，趁住仲行得走得，佢都好應該搵下野做，唔好日日坐響度發霉，唔係真係無病都變有病啦！學佢話齋，咁大個人唔通要攤大手板問老婆拎錢買煙咩！起碼有份工返有少少收入都好過冇！

我都要努力！！！

第二十一堂，響樓下同阿Jack傾計傾到遲左先上去上堂，今堂係Olivia帶課，呢堂主要都係玩身體，所以好累。

一開始又係做返打喊露的練習，Olivia成日都好鍾意重覆又重覆練習，有好有唔好啦！好就係可以知道自己更加多，溫故知新嘛！唔好就係有時都幾悶，尤其是如果遇著d自己唔鍾意的練習，咁就寧願學新練習啦！

然後又係同地板接觸的練習，今次Olivia有讚我做得好呀！我自己就覺得一般啦！

休息時候，Olivia話明顯見到我都好謝皮，梗係啦！你試下一日行哂全港九新界去見工丫！真係人都癲啦！無無聊聊同Martin同學玩塊curtain，勁白痴！！！

休息過後開始下一個練習，想像隻手托住碟意粉，不停咁轉，只係身體幫助，唔可以用雙腳，然後就可以右左交左手，左手交右手，跟住就可以用埋雙腳，好好玩！

跟住就係兩個兩個同學出去轉玩飛碟，嘩！超好玩咁喎！泰臣同學玩得勁好，勁好睇！後來Olivia叫我出去，其實以我今日的狀態真係唔係好想出去，算啦！比左錢黎上堂點都要試下，就響原位跳幾下醒一醒晨先！佢地笑我喎！！！

出到去，係咁轉係咁轉，最緊要係保持住個動力，唔好比佢停，可以自己調較節奏，都唔知有乜咁好笑，Olivia睇得好開心，叫返同學仔入黎由得我一個人玩，仲要我係咁講”嘩”，嘩！真喘氣！好彩跟住泰臣同學入黎，佢地又拎返”茱麗葉”出黎講，話”羅蜜歐”入黎喇喎！哈哈！比我地玩到真係好似一個小片段咁！然後小冰同學加入，我可以退出，一退出即刻攤響地下，暈陀陀，個天花板會轉架！！！

做完咁刺激的練習之後，就係靜態一d的練習喇！

坐響椅上，眯埋眼，Olivia一路比提示我地，我地一路想像，感受，係一d感觀刺激同情感記憶的練習。

開頭係味覺，好多野食，公仔麵、雪糕、咖啡、湯、榴槤、辣椒、話梅，嘩！樣樣都好好味！樣樣都係我鍾意食，真係食到我好飽！然後就返到去小時候住過的地方，醫院，小學；跟住係去到好猛太陽的沙漠，好凍的沙漠，變成一條魚響海裡面游，變成一舊雲響天上面飛，好舒服！！！

我覺得，我最享受係食野同回到過去呢兩個環節，或者我個人念舊啦！呢d練習好有用！我鍾意！

好！要努力睇返”史記”d書先！

去上堂，咁岩響學校門口撞見久違了的阿Jack，即刻捉住佢大吐苦水，講今日見工的慘況。

雖然唔係成日見，係間唔中撞見先至傾兩句，但阿Jack呢個老師真係好好！響我心目中，佢係同修修一樣地位！！！

今日將會見三份工，行程編排得緊緊密密，變態！！！

10:00am 電視台~場務（自己搵）
去到填form，等，行行企企望望外邊風景，都幾舒服，唔經唔覺等到十一點幾先入去見，有一個場地的主館同人事部的人見，傾得都幾開心，介紹自己呀，佢地又問我好多關於我攪戲的經驗呀，邊次係最深刻呀，邊次係覺得同呢份工的關係最大呀，我當然話係《做好狗狗》啦！因為乜野都係自己做，由行政上、藝術上以至技術上都係自己處理嘛！又問我知唔知呢個職位係做d乜，有咩地方要注意，要具備咩條件，我的答案都令佢地幾滿意！整個過程都係響歡樂笑聲中進行，我完全表現哂自己的誠意比佢地睇。最後，都係要等通知，一個月內，咁死啦！為生活，我都要搵野做，咁佢地到時等唔等我架！後來佢地話都會等，通常辭工都係一星期，佢地都可以等到，嘿嘿！希望呢份工見得成啦！

第二站係尖咀見工，即刻搭車出去，沿途又收到agency電話今日又有另一份工見，響西營盤，都好丫！

1:00pm 尖咀建築材料公司~Admin. clerk（agency介紹）
趕頭趕命剛剛上到去，比左一份notice我譯，中文譯英文，唔係嘛？！而家係黎應徵translator咩？佢果d中文仲要係大陸中文，d字眼真係，如果未接觸過大陸行政都未必知道點解，好彩我之前都接觸過！咩”考勤總匯／車間／工種產值產量報表／出／缺勤／勞務”，低能架！求求其其譯比佢囉！下次比份劇本我譯丫笨！！！譯完一入到黎，即講英文，介紹自己之前做咩公司做咩野，又比佢串話同trading好唔同，又話我冇讀過trading，又捉住我讀過聖心黎講，大佬，咁我之前讀聖心駛唔駛教埋你建築材料呢個範疇的野呀！全世界咁多範生意，唔通樣樣都要讀哂咩！傻傻地！跟住又要用普通話介紹自己的性格同家庭狀況，查家宅咁！話就話份工係Admin. clerk，但係做d野係同office assistant冇分別，一d Admin.野都冇！攪乜要吹到咁高呀！
最後，仲要比佢矣落～～
豬：『你以前讀聖心咁專業的訓練，學校應該有教你去interview的技巧架？』
（咪心諗：都冇咩唔妥丫，我對答都ok呀！）
咪：『當然有。』
豬：『咁你覺得自己今日的personnal glooming點呀？』
咪：『我覺得ok丫。』
豬：『咁你可唔可以解釋下點解你今日會咁樣著？』
（註：我今日係著一件墨錄色喱屎吊帶衫，外面加返件白色斯文外套，下面係一條紅色裙褲，仲有一對少少尖頭的民族女人鞋。）
咪：『因為我今日都有幾份工要見，而工作性質都好唔同，有d如果係著哂成套suit會好奇怪，所以我就寧願選擇返中間線，斯文大方感覺。』
豬：『老實講，我地老闆對呢方面要求都好高，響我地公司就算你係一個clerk，都要著恤衫，半截裙，高踭鞋，有少少踭，同埋化少少妝，或者搽少少唇膏。我比返個advice你丫，以你今日的衣著表現，其實係FAILED架囉！』
（咪心諗：痴線架！而家除左係d大企業大上市公司高職位，仲邊有人真係需要咁樣返工架，見到好多人去見工都唔會著suit架啦！都低能架！更何況而家係一個office assistant乍喎！）
呢件正一係死肥豬，佢請唔請我我都唔做呀！佢個死人樣就真係FAILED有突添喇！
之後打返電話比個agency話佢知，佢問我有冇兜返話第日返工會跟返公司要求，冇喎！兜黎做乜先！anyway，都提醒個agency一句，如果第日仲有人喜歡呢份工要去見工的話，就提提佢地著得好d，唔好好似我咁響度比人數啦！
睇黎我都係岩搵返d free d的工做！

懷住極度憤怒的心情，去旺角見工。

3:00pm 旺角保健產品公司~Secretary（自己搵）
去到又係循例問一大輸之前做咩，其實我講的大部份野都已經在我的履歷裡面有哂，不過又吹多次咁解。呢條友比人的感覺好似情婦feel，而呢間公司真係豆腐潤咁細，佢對面剛有個吉位，所以我應為呢個post就係坐正佢對面，好難頂架喎！
婦：『咁睇你以前都係做Admin.野多啦！』
咪：『冇錯。』
婦：『但係你而家係應徵Sec.喎，Admin.同Sec.係好唔同架喎！』
咪：『咁雖然我之前係Admin. Assistant，但係我頭先都講過，我地個部門好細，我只有兩位上司，所以基本上我都係佢地的秘書。』
婦：『唔係。』
（此時情婦響度沉思，而我就對佢越黎越冇好感，想即走！）
婦：『咁啦，Sec.就唔得架喇......』
（咪心諗：唔得？你就真係唔得喇！野唔駛咁講下嘛？婉轉d話唔係咁適合或者你需要考慮喂大家都易受落d丫！唔得！）
婦：『或者sales你有冇興趣丫？』
咪：『我諗我興趣唔大囉。』
（咪心諗：睇野啦！我話～我諗我興趣唔大，好聽呀哩？點都好過話～我完全冇興趣喎！學野啦情婦！）
婦：『咁...好丫！下次丫！』
即走！都唔知咩人，要講的野我一早就響履歷表度寫明，話哂以前都叫做讀過下秘書丫，如果你真係覺得唔覺，唔該爭大雙眼睇清楚先，唔好叫我黎見工丫！浪費時間不特止，最緊要係浪費車錢！！！

都唔知咩世界，見有d工就覺得大材小用，浪費左我，有d就覺得唔岩，好叻咩！

見完呢份工都好累，又唔係好想行街，搭車過返西營盤見第四份工啦！

4:30pm 西營盤建築材料公司～Receptionist（Agency介紹）
Agency話有d人見完呢份工返黎都話幾好，我覺得就係勝在近我屋企，步行大約十分鐘就已經到，要做的野都係聽下電話訂下野影下印出下單好簡單，見我果位小姐又nice，大家好好傾，又唔主張要OT，真係好少有，又話d同事都好nice好肯幫人，咁岩我搭lift上去時有兩個人同lift原來係呢間公司的員工，聽到佢地話有個同事就黎last day佢地一齊食飯，關係真係幾融洽，幾好幾好！如果人工唔到我要求差少少如果佢肯請我我都會做，當係騎牛搵馬都好！

雖然今日見其中兩份工係好唔開心，不過都有兩份工見得好開心！

上星期六一次過又搵左好十幾間JOB AGENCY，自己又SEND左十幾份工，真係一係冇野攪，一唔係就堆埋一齊黎，早鬼知唔駛搵JOB AGENCY啦！！！

今日去左四個地方見工～～～

11:00AM北角某教育中心~見RECEPTIONIST（自己搵）
解釋過從前份工的工作性質同繁複的職責之後，人地竟然覺份呢份工唔岩我，原因係覺得太大材小用喎！真攪笑！呢份工只係D好簡單的工作，聽下電話，同D家長傾下計，佢地呢個POST比唔到咁高人工我，真係吹脹！不過，佢地都有另一個POST想我試的，等待2nd IN。

拎左老媽對尖頭高踭鞋著，夾腳到死！去到銅鑼灣買左對平底鞋，都要買返對鞋啦！啡色民族FEEL，我鍾意！

2:00PM銅鑼灣見AGENCY
冇咩特別，都係傾下想搵咩工，拎我D CERT.同REFERENCE LETTER係咁CHECK，好似驗屍咁！話將我D資料入電腦，好快，聽日就有工介紹我，駛唔駛咁快呀？！

4:00PM銅鑼灣見AGENCY
呢個AGENCY幾NICE幾好傾，傾完做TYPING TEST，驚都未驚過呀！好耐都冇做TYPING TEST，果然冇退步，中文倉頡打字依然係每分鐘七十幾個字，英文打字依然係每分鐘五十幾個字，KEEP得好！

5:00PM銅鑼灣見AGENCY
又係求其傾幾句，話有工介紹的話佢會教埋我去見工的技巧，又幾好喎！而呢個AGENCY又話我唔駛做CLERK同RECEPTIONIST，直頭做ADMIN.喎！哈！真係吹啤啤！有咩所謂喎！橫掂都係唔鐘意做架啦！倒不如做CLERK同RECEPTIONIST舒服D唔駛攪咁多野仲好！唔好煩我！最緊要就係比到我心目中的人工我！

今日又收到勁多AGENCY的電話介紹工比我見，人地D AGENCY都唔駛我上去見又唔駛我去做TEST，就有大把工介紹，係呢幾間咁麻煩！抄低左佢地個名，第日再要搵工唔會搵佢地，亦都要叫D FRIEND都唔好搵佢地，費是無情白事蝕左幾張証件相比佢地，大佬，都要幾蚊一張架！！！


聽日見工SCHEDULE～～～

10:00AM 電視台（自己搵）
希望呢份可以即刻見得成，就算人工少都唔緊要，只要夠車錢夠自己用都已經OK，趁後生，興趣係最緊要！如果真係見得成，就唔駛見其他啦嘛！希望有好消息啦！！！

1:00PM 尖東建築材料公司～ADMIN. ASSISTANT（AGENCY介紹）
係AGENCY介紹，見完工仲要打返電話比AGENCY，佢地直頭好似湊仔咁！

3:00PM 旺角唔知咩公司～唔知咩POST（自己搵）


後日見工SCHEDULE～～～
9:00AM沙咀唔知咩公司～唔知咩POST（自己搵）

11:00AM 北角唔知咩公司～OFFICE OPERATION ASSISTANT（自己搵）


自己都搵到咁多份工見，痴線！！！今日唔SEND APPLICATION LETTER住喇！等聽日見完工先啦！！！希望好運！！！

星期六勁send application letter同搵agent，諗住都係搵agent幫手搵工，快靚正，人工又可以高d！今朝十點開始就大把電話打黎，真係冇時停，全部都係d agent咁滯，仲加埋有幾份工見，真係好日又唔見d野撞埋一齊，頂丫！

首先係三個agent，約左聽日下午去見，好彩全部都係響銅鑼灣，方便d！跟住係北角一間教育同出版中心，約左聽朝早去見。

然後又收到一個電話，係響旺角一間公司，唔知見乜，anyway，約左後日下午見。

最後，係電視台見場務，本身佢想約我聽日下午見，不過最衰聽日下午要見三間agent，佢又唔早d打黎！！！真係好想做呢份工。。。雖然知道係好辛苦。。。人工又少，終於約左後日朝早去見，嘩！真係，忽然間咁多工見，真係唔得我死！！！

為何今生財運通，前世獻花敬佛祖。
為何今生狀元才，前世修橋鋪路來。
為何今生跛腳人，前世殺雞殺鴨人。
為何今生貌美人，前世獻花敬鬼神。
為何今生常生病，前世惡口常罵人。
為何今生娶美妻，前世捐錢助窮人。
為何今生嫁俊郎，前世捐地造廟堂。
為何今生發大財，前世捐錢助乞丐。
為何今生常受騙，前世原是騙錢人。
為何今生做大官，前世原是大善人。
為何今生常意外，前世原是捕獵人。
為何今生得孝子，前世關心他人子。
為何今生學問高，前世念經普渡多。
為何今生得祖產，前世捐印善書多。
為何今生無子息，前世殺狗做香腸。
為何今生是啞巴，前世定是是非人。
為何今生是瞎子，前世打鳥捕鳥人。
為何今生長壽人，前世雕佛供人拜。
為何今生損妻星，前世欠錢不還人。
為何今生損子星，前世捕兔做香腸。
為何今生無爹娘，前世惡口罵老人。
為何今生子不孝，前世定是歉孩人。
為何今生房產多，日月行善前世多。
為何今生妻妾多，前世放生行善多。
為何今生發癲狂，前世放火燒廟堂。
為何今生開汽車，前世原是馬車伕。
為何今生做廚師，前世伸手懶惰人。
為何今生沙啞聲，前世上吊是前因。
為何今生不貪污，前世廉節做官人。
為何今生開酒家，前世定是賣酒人。