隨著我的黑暗時代來臨，

丁家貓夫人我決定係時候搬離呢達傷心地...

哈哈~ 我意思係，我要搬hompy喇！

由於我而家同我姑奶一齊住，多左一個netvigator a/c，而佢地個a/c又收得平d，所以決定cut左我o個a/c！

期實我都好唔捨得呢個hompy，不過舊o既唔去，新o既唔黎，希望整好d個新hompy啦！

仲有... 整係搬個friend list已經有排搞... 大家有無咩快捷d o既方法呢？

我的新hompy地址係：

丁家貓夫人的黑暗時代

http://hompy.netvigator.com/main/page/milly817

62xxx ── 呢個數字實在得來不易。

在此多謝我的朋友們一直以來的支持，希望在我新的空間裡，依然有你的支持與安慰。

呢一日始終要來臨... 今日阿泰終於都要走喇…

佢朋友阿貓車佢去機場，本來我好想送機，但無奈又要同媽媽去覆診…

我同阿泰一齊出門口，o係樓下車站吻別，我又忍唔住喊左出黎，

其實我最憎就係o係阿泰出門o個一日出街，因為我一定會忍唔住，於是o係條街度俾人望住晒，真樣衰。

最好就係可以安安靜靜地留ｏ係屋企，鍾意喊幾耐就喊幾耐～

佢上個月11號返，而家未夠一個月就要走，ｂ女15號就半歲喇~ 佢咁都唔等埋，真可惡…

佢下午到左韓國轉機，打左幾次電話俾我，我次次唔係做緊家務，就係o係商場收唔到…

一直到夜晚我地先通到電話，個衰佬咪又係同我講：我睇下點丫~ 早d做完野咪早d返lor…

唔好呃我喇衰佬！

早o係未結婚前你已經同我講，好快會結束埃及o既工作，唔洗再飛…

到生b女前，你又同我講，好快會請人接手工作，唔洗再飛…

究竟…究竟要「好快」到何時啊？

之前阿泰走，都話請定工人幫我手，而家無左工人，我要真真正正一手一腳照顧b女…

對於自己都未顧得掂o既夫人我，有無限o既憂慮…

但我好相信nothing is impossible，人地得，點解我唔得？

( 其實呢句係安慰自己o既說話，講就當然容易，而家都係見步行步咋… )

阿泰今日12:50pm飛，要聽日12:15pm先到，真誇張。

今次一別，唔知又要等幾多個月先可以再見...

今日係阿泰o係香港的最後一日，我地只係好平淡地渡過左，

最後一日，當然唔少得點下佢做野啦~

夜晚同佢屋企人大家食餐飯…

記得對上o個次， b女滿月前一日阿泰就要走，

前一晚o係佢屋企人面前哭得死去活來，異常樣衰…

今次，總算叫做冷靜d…

今日阿泰上左廣州做野，我可以實習下一個人o既生活。

中午去左搵媽媽食飯，順便去商務拎上網訂o既三毛小說共13本。

下午返到屋企，惡夢開始。

b女一入屋即喊，原來賴左便便，於是我即刻裝水同佢沖涼，

一路裝水+準備沖涼o既用品，一路聽到b女大喊，而且越喊越淒涼，近乎尖叫...

終於都沖好... 點知一沖完一放低，又喊...

沖完涼都大喊？咁應該係肚餓，於是放低晒所有野，衫仔都未著就抱佢入房飲奶，

飲完見佢想訓，但一放低... 又喊... 又放... 又喊... 又放... 又喊...

見佢唔訓，索性拎d玩具俾佢玩，見到佢一玩，我即刻拿拿聲搞埋d"手尾"~ 倒沖涼水、收返d用品、洗衫...

點知洗緊衫 (因為只係bb衫，所以用手洗)，b女又開始喊，我又放低d野去睇b女，

又tum左佢好耐... 再去洗... 再喊... 又洗... 又喊...

然之後收衫晾衫摺衫... 好似有n咁多野要做，永遠做唔完... 就係咁，由入門到真係搞掂，差不多用左2小時...

b女從來都未試過喊咁耐... 今次佢見我得一個人，就o係度蝦我...

原來只係洗一洗b女衫都唔少野，淨係o個條死人大毛巾都扭到我傻...

夜晚去左媽媽度食飯，返到屋企B女又扭計，成晚要抱，一放低就喊...

唉... B女，你唔好蝦媽咪啦...

尋日同阿泰搭輕鐵去元朗真係超搞笑！

基本上來回兩程車D人都不停搭訕，多數係D師奶撩下B女玩又講下湊仔經。

後來有個師奶上車，行到埋黎"莊一莊"B女，話：「哎呀~ 乜係bb呀？我以為你做咩抱住個公仔呀！」

之後又不停講bb野，有一句勁搞笑：「而家到3歲係最好玩架！不過一到3歲呢~ 你就想打死佢喇~ 」

今日睇大家o既留言，一邊睇一邊眼濕濕... 好多謝大家o既關心...

真係唔好意思，嚇親大家... 我就係咁架喇... 成日會忽然灰到想死...

但你地放心啦... 如果我要死，就一早死左lu...

有時都會諗，係咪唔應該將愛情/老公放第一位，令自己咁辛苦？

但其實，又有幾多個女人真係可以看得開丫~ 女人真係可憐...

尋日b女真係搞鬼，當我抱住佢喊得最傷心時，佢竟然hehe咁望住我笑...

搞到我哭笑不得...

今日，我好快脆就無嬲阿泰，雖然唔係話"friend返"，但叫做無冷戰！

阿泰o係屋企，可以幫我湊住b女，等我可以做下家務，

其實阿泰返左黎咁耐，我地拍拖o既機會真係唔多，

一來佢硬係日日都好似好忙，日日都梗有d野要做，好難先約到佢個full day，點知又鬧交...

二來出親街，第一樣諗o既就係有無地方餵奶... 簡單黎講即係邊度都唔洗去...

而阿泰可能都認為自己唔o岩，所以夜晚同我出街食飯，我地去左元朗行街食飯，貪o個度有育嬰室！

新元朗中心可以講話係無野好食... 得一間「紅樹林」餐廳叫似樣d，但食落估唔到咁好食！

我地之後同b女去左「荷花親子中心」揀玩具，b女自己揀左個玩具，可以愛黎咬o既，o岩晒佢！

好開心今日終於唔洗俾人鬧喇~ 阿泰終於變番好聲氣左~

其實我真係無咩要求架，只係咁樣一家人行下街食餐飯，已經好滿足。

今日原本都幾開心，可以同阿泰行下街買下野，夜晚去奶奶度食飯，

點知夜晚返到屋企，阿泰為左好少o既事而發左我好大脾氣...

我只係唔小心推bb床時碌到佢隻腳，我正想say sorry時，都未開到口，

佢竟然想殺人咁怒啤我，然後超大聲地：「你整親我唔識講咩架？」

我見佢咁惡，當然收返句sorry，換做：「你洗唔洗咁惡呀？你平時整親我都唔會講sorry架啦！」

之後幫b女換片，我o係則邊幫手，佢又不停鬧我...

我忍唔住係咁喊，一路喊一路幫手，我個心只係一直諗住：「為左b女，我要忍...」

俾著以前，我大概已經發難咋一走了之，又或者衝入廁所反鎖自己大喊一餐，

但如今，我唯一可以做o既就只有忍！

我唔想嘈，嚇親b女；亦唔可以走，唔理b女；更唔可以死，丟低b女...

雖然阿泰之後有say番sorry，但我真係好傷心...

其實今次阿泰返黎，佢d脾氣真係臭左好多... 呼呼喝喝之餘... 總之任何野都係我錯...

相比起我生完b女坐月時，判若兩人... 或者佢已經忘記左我生b女有幾辛苦...

每次當佢鬧完我，我就會諗起每日都要睇爸爸面色做人o既媽媽，我覺得我彷彿行緊佢條舊路，

為左我地幾個細o既，吞聲忍氣，一忍就忍左咁多年...

有時，我真係好有衝動，企圖衝入廁所，吞下半樽滴露，一死了之...

因為我覺得，如果連同我走埋下半世o既人都對自己唔好，其實自己o既人生已經走上絕路，

咁辛苦唔知為乜... 當然，o係呢一刻，為o既係b女...

前幾日阿姐走左，奶奶答應請番個印庸俾我，如今不了了之...

而阿泰星期五就會走... 預定過年先返...

一切都唔o係我可以掌握o既範圍之內，亦唔到我say no...

我的黑暗時期將要來臨...

呢幾日開始，我要習慣下一個人照顧b女o既生活...

好想快d幫b女轉飲奶粉，戒左人奶，咁就算我唔食，b女都有得食嘛~ 又或者我有咩事，b女都唔會餓親...

我真係唔知道自己仲可以捱幾耐...

呢兩日都無上網，因為換左座新電腦枱，要執好耐，

短短幾日，成個世界唔同晒... 世界~ 當然係指我屋企...

話說工人阿姐說話無分寸，已經犯晒眾憎，所以尋日正式解僱左佢...

話明犯眾憎，當然亦包括我，佢做左d令我好嬲o既事，照計我應該好想佢走...

但係人，畢竟係有感情o既動物，話晒相處左4個半月，好難話當無事發生...

見到佢走，忽然離愁別緒氾濫，好有流淚o既衝動...

佢走左之後，我成日o係度諗，佢而家點呢？習唔習慣呢？

佢湊左b女咁耐，唔知佢有無掛住b女呢？b女又有無發覺少左個人呢？b女會唔會掛住阿姐呢？

尋晚老公開夜，睇見一房o既零亂，更加想念阿姐...

今日幫b女沖涼，沖完涼洗b女衫，已經n年無洗過衫，

之後收衫摺衫，再加上酷熱天氣，我覺得自己彷如回到昔日埃及o既生活...

今日係開學日，我同阿泰就o係九年前o既呢一日，o係kc中學邂逅...

佢亦可以叫做係我入kc讀書o既第一個朋友仔，諗番起當日o既片段，就好似尋日發生o既咁！

不過，昔日我心目中o既死飛仔*，已經成為我o既好老公喇！

 *ps: 最憎d懶高大、懶型、懶係受女仔歡迎o既男仔架喇！所以識左6年先至同佢一齊。