近排,同事F參加左個COURSE,內容大致係認識自己,尋回自我,參加既人會透過一連5天既課堂,藉著一D活動去了解自己.點解我咁清楚?因為我都參加過.記得兩年前,有一個好熟既客人推介我參加,話我日日響度OT唔好,參加完個COURSE就唔會咁做,會識得分配時間,珍惜身邊比工作重要既野.我對個COURSE一D興趣都無,但見佢打說我咁多次,我就拉埋賴皮一齊參加,結果我地上左大半個鐘就頂唔順.最後,仲要俾人哦左半個鐘先走得.個客話估唔到我咁硬頸,哈哈.咁唔岩聽就係唔岩聽架啦,我最唔鐘意佢地好似要同你洗腦咁,仲特登用一個隻手有缺憾既人做MC.我真係唔會APPRECIATE囉.

講番F,佢參加完個COURSE,成個人都唔同左.日日準時放工.請我地三個女同事食糖.主動同迪絲傾計.呢一切從字面上來看,好似幾好WOR,但如果你係認識佢耐D既話,你就會覺得好怪,好難接受.覺得佢好似被人洗腦變左另一個人.仲記得第一日返來,佢約我返工前羅返張工卡,響一齊行返公司途中,突然搭住我膊頭,問我近排點,嘩,個時係返工時間,D情侶同事都只係響未到公司時拖下手,俾人見到佢撘我膊頭,仲洗得清既???近排點?聽到都覺得唔係好舒服.前日,佢仲SEND封EMAIL俾我,希望我能夠打開個心同佢做好朋友 '

呢排都無乜心機做野,成日都好似拖到放工先清野咁.咁樣落去唔係好得WOR,要想想辦法.

聽日要返鄉下,媽咪落ORDER要6點鐘出門口,救命呀............仲慘過返工.兩日假期又無左啦..........

呢兩日發覺自己肥左,死啦,要多D做運動喇!!!

今日,心情麻麻...

12點幾W先到公司看辦,攪到1點幾先走.迪絲入來坐左唔夠2分鐘,講左句"我出去先,唔阻你地喇.."就走左食飯,攪到我唯有同W食飯...

食完飯,三點左右又要去九龍灣,D貨又有D唔得,攪到要去觀塘洗辦先返公司.坐的士已經累到訓著,點知尾尾打來講埋D無聊野.最討厭就係訓訓下俾人吵醒,攪到勁躁底咁返公司做野.

因為約左瘦同學看戲,所以喪躁咁拋低好多野走,聽日死梗啦.............

迫上斷背山都幾OK丫,最衰係心情麻麻地..............

朋友CACA突然宣佈同BF散左,真係好突然.所以,就算多野做,都出席飯局.

佢BF係因為開始對段感情淡左,於是對CACA冷淡左,結果,借著一件好少既事引發分手....其實,當初見佢個BF就覺得佢同問我拎返所有野既BF係份屬同一種人.對佢沒有好感之餘,還有一種敬而遠之既感覺.所以今趟CACA同佢無左,覺得一件好事.拖拖拉拉倒不如撇撇脫脫好,長痛不如短痛嘛.

CACA咁好,一定會遇上一個更加好既!!

尋日肥B去左美國喇.雖然係做阿四,返到香港會做到死,但係我覺得係一個好好既體驗.媽咪問肥B點解係佢去,唔係我,肥B無好氣解析因為大家跟既MANAGER唔同...

如果係以前,我想我應該都有機會出TRIP,但而家轉左跟迪絲,我想響我O係呢間公司既有生之年都唔會有機會囉.隧道同迪絲相比,隧道響SOCIAL方面真係強好多,英文方面就簡直無得比.但係調轉頭看迪絲有人情味,講野負責任.跟佢響工作上舒服好多.

每件事都係咁,有正必有反,有得必有失.

尋日想左好耐,去埋書局,決定考4級試算數.報完考試,找不到尾尾.激死我啦...因為姑母話自己配火牛,咁我地就有時間去電腦節.

其實我唔係咁想去,無計啦.........去到發覺勁多人排隊囉,原來唔係電腦節人多,係家居同婚紗展多人.不過入到會場,一樣係勁多人.去到D人多鋪位,簡直每半分鐘行一步,兩隻手一方面要拎袋,一方面要保護自己,結果,右手響行完一行後就激痛.我發覺電腦節最多人看既唔係電腦產品囉,係D 著得好性感既PROMOTOR,無論老,中.青,大部分都心口掛著部相機.一見到D性感PROMOTOR就起勢影,好誇張.咁樣真係可以刺激銷量??電腦節點解要變成咁?

結果,行唔夠半個場,尾尾覺得無乜野買,同埋我極度無心機既表情,終於揀離場,多謝曬哈哈!!!

夜晚食飯時,尾尾隻眼越來越痛,我就話肯定係望得D PROMOTOR多啦..呵呵...

好開心呀!

雖然隻腳仲痛,不過今朝收到個好消息.阿BIG又有喜喇.唔知仔定女呢.肥B話如果係女,千萬唔好似家英哥咁有個大眼袋.咁又係,如果女仔有大眼袋就無咁好啦.嘻嘻,遲D屋企又多個新成員,好熱鬧,好開心,到時候,屋企就有十三位成員喇!

近排真係黑仔.上個禮拜同賴皮LUNCH食車仔麵返公司途中,竟然得我一個”杉”到玻璃.第二日開始,個腳板邊就開始痛到而家.到左尋晚,仲到小腿痛.尋日仲要唔知點解肚屙.成晚屙成4次….唉,究竟攪乜呀............

放工時,肥B同尾尾陪我看跌打,個師傅一按一挫,真係好入肉呀...結果,隻腳包到成隻粽咁走,好彩淨係包一晚....