最近公司好多人離職，做HR真係請人請到暈，而且接近年尾，根本係好難請人的，另外加上Team友下個禮拜離職，工作真係百上加斤。而我們的好經理，成日三句唔埋兩句就話想離職，攪到我地冇晒士氣，都唔知同唔同你搏好，唉．．．

前日公司基督徒小組攪咗個中秋午飯聚會，我地幾個HR同事都有出席，雖然當日程序比較混亂，但睇得出佢地好有心去籌備，真係好多謝佢地。而我哩日好幸運地抽到個大獎（iPod Shuffle），是有心人捐出來抽獎的，唔，睇黎我都仲有D運播～

尋日Lunch Time提早同Team友Fairwell，去咗訂營地既卡啦OK房唱歌，$90可以唱兩個鐘，搬咗黎咁耐都係第一次用佢地既設施，雖然D歌唔太新又有跳線，但都玩得幾開心呀，不過就好趕囉！夜晚就返黃宅做節，拜託黃生放工去大班買冰皮，買咗兩大盒，天氣又熱月餅又重，真係辛苦晒佢。



做節，黃爸爸自然又係煮好多餸，但佢地食唔夠十分鐘就停晒手，個個咁細食就唔好煮咁多嘛，樣樣餸都話唔留得，攪到黃生次次都要將Ｄ餸倒晒落肚。食完飯切冰皮食，唔，好好味呀，咁麻煩都要買大班都係值得的，因為真係好食Ｄ呀！

祝大家都中秋節快樂，人月倆團圓。

真係好耐冇update喇....今日都已經係八月最後一日。

前排掛住睇奧運，所以真係好少上網，哩個奧運好難忘，除咗因為中國辦得好成功之外，就係黃生在八月八日晚上送咗一個"高清"奧運比我，好驚喜，但要佢洗咁多錢，我真係幾肉赤呢，但又真係值得架，因為用高清睇真係正正正正正好多架！

另外，就係公司好多事發生呀！經理用盡好多方法，終於迫到阿副經理遞信，但當經理諗住升阿得力助手上位既時候，得力助手竟然又遞埋信，仲要兩個禮拜後就走．．．唉．．．而家已經忙到七彩，未來日子將會係九彩．．．希望我仲有命上黎Update我既近況啦！慘～

最後，我依然未買電腦，因為將筆錢用黎去旅行，哈，黃生終於肯同我去旅行喇，好開心呀，我地會去峇里，下月尾，會跟團，因為唔信得佢過，嘻！不過，而家部門人手突然咁短缺，真係去旅行都去得有ｄ唔安樂．．．

Creamy: 我清咗個信箱喇！
Kris: 我冇返鄉下呀，我都冇回鄉證，嘿！

又到報告近況既時候！

首先，我好掛住大家，所以我決定要買部Notebook，等我在家都可以上網探你地，但仲心大心細唔知買邊部，希望哩個月內買到啦！

見到小琛既問題．．．其實我對佢係有信心，不過，佢待人接物既態度往往令我好唔舒服，佢唔會接受人，但亦都唔會拒絕人，對人總會用最好既態度、最好既語氣。佢係咪天生桃花？我覺得係，識咗佢五年，我發覺不論三歲至八十歲既女士都會喜歡佢，所以我先唔想佢去唱歌show off，又怕佢唔知惹咩桃花返黎，加上我又唔可以去現場睇佢唱．．．不過現在佢參加已成事實（上司指明要佢唱），我都只有無奈接受。

尋晚入將軍澳同黃生既婆婆慶祝生日，途中黃生收到短訊，是一個舊女同事Send來，內容其實冇乜特別，但最un眼既係佢稱呼黃生做BB，我梗係唔高興啦，於是叫黃生覆佢時加句：

＜妳唔好再嗌我做BB喇，我女朋友見到會唔喜歡架！＞

個女仔竟然覆：＜你delete咗佢咪得囉！＞

嘩．．．咁講野都得？真係激到我扎扎跳，幸好黃生都有為我作一點反擊（來回6、7個短訊），我個心先舒服少少。點解而家ｄ女仔係咁架？

多謝各位關心啊！

我粒瘡瘡，食了七日抗生素之後，而家扁平好多（由很突出變成微拱），加埋用遮瑕膏可遮到八九成，但就唔覺佢會完全自動消失，過多一陣子啦，我會再去覆診．．．因前排食抗生素既關係，攪到食慾不振又瞓得唔好，有點怕怕。

最近自己部門都幾混亂，新經理（我稱為大姐）都返咗兩個月，開始著力重整部門既聲譽．．．而大姐因為不滿二姐（副經理）既工作表現，或者有可能會向佢開刀，每日都好多是非，唉，我地做細都理唔到咁多，唯有見步行步。

黃生哩排又有艷遇，話說佢每朝搭巴士，坐佢身邊都會係同一個女仔（我地稱呼佢做＜蒜茸飽＞，因為佢朝朝都食），開頭以為係"慣性坐位"關係啦，但後尾就算黃生調去其他位坐，哩個女仔都跟住佢，你話係咪好神奇？而且平時坐巴士，正常人都會同隔離既人有一段距離，但蒜茸飽就會貼住黃生坐，雖然唔係挨住，但都冇理由掂住，而家唯有叫黃生揀啲單丁位坐，盡量避開蒜茸飽啦！

另外，黃生被同事力邀參加其政府部門既歌唱比賽，佢回來時很雀躍，還叫我替他揀歌，但我就話唔想佢參加．．．咁係咪好衰呢？

又好耐冇上黎，我諗多數會變成週記，或雙週記了。除非我盡快買部Notebook啦，因為在公司好忙，屋企部電腦又好慢，但我又想留返啲錢九月去旅行，真係心大心細喇！

2008.7.17

係我同黃生拍拖四週年紀念日，但我同佢都好忙，請唔到假，所以唯有延遲慶祝。

2008.7.18

放工同黃生去APM食板長，黃生狂叫野食，我第一次食壽司食到飽到行唔郁，埋單$360，食物水準我覺得OK，唔太驚喜，但黃生就覺得好正！

2008.7.19

去APM睇蝙蝠俠－黑夜之神，兩個半鐘頭全冇悶場，有深度有特技有演技，好正，好可惜，小丑已去，冇辦法再演下一集，佢真係做得好好，要向佢致敬，另外還有香港的夜景，好靚，作為香港人應該要入戲院捧場呢。

2008.7.20

去了九龍灣展貿的Hello Kitty Black Wonder，入場費一百，黃生嫌稍貴，但為了我都甘願付上金錢和時間。坐車要排隊，買飛又排，入場再排，足足等了40分鐘先入到場，Briefing時遇著一個細路女不停嗌好驚，攪到工作人員手足無措，好攪笑。遊戲其實好簡單，正常都應該可以成功救到Hello Kitty 同 Daniel，我同黃生兩個懶快懶刺激咁玩，攪到好快玩完，其實應該慢慢玩呢．．．用咗45分鐘就完成了，好以嘥咗少少！

2008.7.21

我同黃生都請了假，本來想去迪迪尼，但因為酷熱天氣關係所以取消了，皆因我唔想變成一舊炭。之後就改為去睇醫生，因為我面上粒瘡瘡已經存在了一個月，沒有好過。見完專科醫生，心情好down，面上那粒他們俗稱為粉瘤，吃藥也未必醫到，根治方法是做手術切除，但會有疤痕．．．醫生開了七日抗生素比我，埋單$890，唯有食完先再打算吧，唉～

我面上粒瘡瘡依然沒有好轉過，仍然是腫腫的黑黑的，一毫子那麼大．．．很多同事都叫我去美容院搵人攪攪，但怕遇著個手勢不好的，毀了容怎麼算？尤得它繼續留在面上？唉．．．我都不知怎算好！有冇人可以打救我？

最近常常落雨，而我同黃生又少出街，很想買對水鞋，但偏偏附近商場都沒得賣或很貴。但前日食午飯既時候，遇見一間臨時賣鞋商舖，好多水鞋賣，好開心，夜晚約了黃生去睇，終於買了一對心頭好，二百幾蚊，個款都唔太差，最少唔洗捱貴水鞋先，因為之前在沙田新城市見到有的係好靚，但成七百幾八百，唔捨得買啊。

尋日一早起身就黃色暴雨警告，超大雨，水鞋可以出動，哈哈！著晒雨褸、水鞋、雨遮，以為今趟萬無一失，但原來咁大雨，啲水會由個鞋筒流入對腳度，所以都唔係百份百防水，下次要帶多對襪先得，不過行返工時真係好爽，唔再怕大水氹，踩踩踩冇有怕，哈哈！真係買得合時喇！

如Fion所說，我已經當R事件告一段落，希望佢唔好再介入及影響我同黃生既感情，我而家真係唔係好捱得打，實會輸的。

最近黃生都多咗陪我，仲間唔中去睇戲，最近睇左＜殺神特攻＞，有我喜歡的安祖蓮娜祖莉，套戲故事好簡單，劇情都係，最突出係音響同視覺效果，好型好Cool～不過結局有點草草了事，雖然頭尾呼應，但稍嫌有點"不夠喉"的感覺。

哩排為咗氹自己開心，出咗部新電話，銀粉紅色的LG，靚靚，影相都好靚，開心。

最近公司真係好忙，冇時間去探你地，真係Sorry，亦可能因為工作壓力大既關係，臉上生了兩大粒瘡，類似暗瘡但冇頭，表面平滑，只腫起了一大舊，兩個多星期了，都沒有轉好的跡象，而且越來越黑，點算好．．．

其實，我已經如大家所講既忍呀忍，你估我唔想好似阿Kris咁講，叫佢死去Ms R度咩，但，咁咪中咗個壞女人既計？我唔可以打敗仗既，所以打後個兩日，都係同黃生慢慢傾，雖然好唔開心，但都盡量唔表現出來。

最後黃生終於肯行多一步，佢口讀我打，Send了以下的SMS給壞女人。

「妳不要再打電話，Send SMS或留言給我了，我很愛我的女朋友，唔該你唔好再騷擾我！」

到了第二天一早，R小姐回了短訊，但這短訊明顯是給我的（因為好耐之前，我曾經私自用黃生電話SMS佢），佢可能以為我瞞住黃生來話佢。

「我並唔愛你男朋友，我地只係好朋友...你要相信阿X係好愛你的，為你付出好多...而我，令你唔開心同擔心，真係好對唔住...我相信我好朋友對你所承諾的真心，希望你都同樣相信他，用愛去回應他...我答應你唔再打俾阿X，呢樣係我唯一可以為我好朋友做的事，希望你唔好怪他，你兩個可以好好相處番，可以開心番。」

你睇佢幾奸乍，一邊在扮偉大扮我誤會佢，然後我順理成章變成小氣鬼，佢以為黃生唔知情，所以就打一大段野，真係好陰險．．．佢根本完全否定係黃生send比佢。

R，其實黃生從來只當你係舊同事、普通朋友，好朋友？No way啦！睇到你段野真係想作嘔呀！