陸寶@狂流 12/05/2005 00:30

翡翠音樂幹線2003無間音樂 音樂潮@GIV 勁歌金曲 TVB一站通 翡翠明珠每晚速遞 K-100 香港小姐2004 英皇新秀歌唱大賽2004 台慶搜映 萬千星輝賀台慶2004 歡樂滿東話2004 2004勁歌金曲優秀選第二回 2004 tvb x'mas 廣告 2004叱o宅樂壇頒獎典禮tvb mc 英皇慈善基金攜手送暖到南亞 四海一心送關懷 勁歌金曲2005 香港直播 總有睇過其中一個節目掛？！ 知唔知咁多節目有咩共同既地方？ 係囉，咪就係實見到一個上位上得好快既人， 崔建邦amigo 無記鬧小生荒之餘，係咪都無人做男主持呢？個個show都係佢？佢又唔特別標青，香港直播走左陳海琪，之後佢都竟然有份接棒做名人專訪？！做勁歌主持，何韻詩好過佢啦，再唔係搵阿cryus啦，佢宜家半夜做幹線，留晒鬚根，好鬼潦倒咁。

heyman@狂流 09/05/2005 11:50

睇完拉闊F.I.R.後幾日都唔係咁安樂，好有失樂感，唔知有咩問題，總係覺得聽佢地cd好過睇佢地玩Live，諗o左幾日都唔知點解，搞到頭都爆。 完o左show成4日，宜家最記得o既，就係孫燕姿唱o個兩首歌、同埋阿Real自彈自唱古巨基o既《愛與誠》，古巨基走上台同佢一齊唱《愛與誠》呢兩幕，其他F.I.R.唱歌o既情景，竟然唔係最記得......感覺奇怪，點解？ F.I.R.o既《無限》我覺得好好聽，對佢地d歌都好熟，但係睇完個Show，最記得o既地方竟然唔係佢地唱佢地d歌o既情形，而係古巨基同孫燕姿.......究竟係點解？ 我又唔係唔鍾意F.I.R.，點解佢地係台上o既表演會變得咁模糊？點解點解？

陸寶@狂流 05/05/2005 17:30

大家有冇入戲院睇’早熟’ 呀？ 嘩！房祖明，嘩！薜海琪，貧富懸殊年青人相戀不理父母反對仲要初嘗禁果共赴巫山點知搞大左唔知點收科跟住出走鄉間打魚，嘩個劇情咁老土既，主角又唔夠吸引，個戲名又’ 娘娘地’ ，都估應該唔多人睇掛？ 不過，’早熟’ 票房竟然好過同期既’ 三岔口’ ，仲要有人睇完話好戲，結果我陸寶都忍唔住要買飛入場睇…… 爾冬陞導演，你真係堅！咁普通既故事，都拍得咁閱目，咁細緻感人，薜海琪係你既鏡頭下，應該可以得到最佳新人，呢綠葉演員，曾志偉、毛舜筠、黃秋生、余安安，好到冇得再好，我都唔講咁多，不如大家分享下你地既觀後感啦。 好戲要入戲院睇咖，咪bt呀大家！ 不過，我都係得覺個戲名改得唔好，好似我個題目咁起得唔得。

heyman@狂流 03/05/2005 17:10

古巨基《勁歌‧金曲》演唱會我冇睇，但係我睇o左now.com.hk o既精華版，27分鐘片段不停咁唱歌，睇到基仔o既造型，就令我諗起日本漫畫大師手塚治虫筆下既主角，咁o岩最近無記播緊手塚治虫o既《火之鳥》，大家可以睇睇以下圖片作一對照，你就會知道兩者有幾似。

手塚治虫o既《火之鳥》同古巨基《勁歌‧金曲》演唱會我都係第一次睇，《火之鳥》就好睇到爆，我逢周六晚都追，比古巨基《勁歌‧金曲》演唱會(精華)好睇得多。

陸寶@狂流 28/04/2005 18:45

你今日拯救左地球未呀？ 未喎，飯都未得閒食喎…… 睇話劇有時真係膽搏膽，又要早成個幾兩個月買飛，除左知道邊個劇團搞，知道邊個大卡士擔大旗之外，其餘咩野都好神祕，故仔講咩？好唔好睇？個劇幾長？所以往往入左去坐低左先有定案。你知啦，越是期待，越是美麗。反之，越是期待，越是眼厲厲。 W創作社x 林一峰 x 蘇玉華喎，一出d飛就去左九成啦，唔好講其他，凈係林七峰個名，都實爆到七彩啦陰公，我陸寶仲唔仆到去買飛呀？ 首先，個劇D創作人係鐘意睇東touch，許誠毅做果個opening既維港香港巨星機械人係來自小克，有個角色千面大盜就來自阿德，唔知有無比番個credit人呢？ 最正都係有一峰演出，佢一開口唱歌，成個劇場空間好有質感，尤其係老麥呢d比較小既劇場，佢就簡直係人肉催淚彈，做戲又唔做作，（你知d做話劇既，d演技好誇嘛），佢唱live既感染力真係「誰能代替你地位」？個子雖小，嗓子卻高，講真阿一峰係一個幾可愛既男孩，可惜同二汶個性別掉轉左…… 蘇玉華既演出真係好厲害，個劇要佢又喊又笑，佢就收放自如，不過個油麻地劇情就浪費左佢既心機囉，臨尾個劇要佢咁大犧牲又帶唔出好大既impact，唉…… 聽個劇名都估到係比成人睇既兒童劇，都估會睇得開開心心，但過左中場休息，個劇就死唔斷氣，又長又今，阿七峰又少左d戲份，劇情又有D失笑(真係有人係懶感人位笑左出泥），真係想走人番歸睇「大長今」，不過好在謝幕時有好大既驚喜，個director竟然矮過一峰，妙哉，妙哉！

heyman@狂流 26/04/2005 17:00

早兩日講過有隊band叫Soler，上周五我就睇o左佢地o既表演，一個字講晒︰勁勁勁 上個禮拜五o係城大個大學連場撃，由孖生兄弟Julio和Dino組成o既Soler，表演出驚人o既魅力，在場數百位觀眾，當中大部分人都係唔識Soler呢一隊組合，但係睇完show後，個個都話佢地正到爆，Julio企係台前好識搞氣氛，令全場人都記得佢地，呢d就係叫Charisma，香港冇一個新人新組合有佢地咁勁o既魅力。 香港樂壇，近來勁吹洋風，唔識中文o既歌手個個都好掂，出o左名o既有陳冠希，新人有剛剛提過o既Soler樂隊以及黎明小師妹衛蘭，個個都好有實力好有台型，莫非香港土生土長o既人真係唔夠佢地o黎?

陸寶@狂流 23/04/2005 12:15

歌詞呢家野期實好神奇，填詞人好多時咁填左D好personal既野，或者填得虛D留番個空間比受眾﹙你受既話﹚去感受，一般人完全理解唔到字面意思，但樂迷往往能自完其說一番，大說有feel兼勁buy妙哉。 今期milk週熱鬧樂壇個地盆，睇到樂迷對派台歌意見精選，阿晉文公「話邊有人用假音唱rock歌ga??! 」，阿周國賢話「搖滾叛徒？ROCK? If it is the standard quality of RocknRoll song in HK. RocknRoll will never popular again. 」，另一方面，樂評團既四個嘉賓，就有三個選左呢首歌做三甲歌，D意見咁兩極既？咁我陸寶咪搵首歌睇下，有d唔明，睇下大家可唔可以幫下我，點醒下我。 搖滾叛徒 周國賢 作曲 :周國賢 作詞 :周國賢 人人也分黨分派　勇敢擺姿態 為何我安享收買　隨便去賣乖 這血液搖滾　可惜不再悲憤　我淪落到凡塵　wow... 已貴為帝軍　始終不夠興奮　我忘掉學勇敢 別見怪 仍未戒奶 岐視過俗世善惡心態 大世界 踩不出界 曾經不甘去被活埋 很想去踩 踩出偉大 想攻破公式規界 將他瓦解 分出勝敗 招數竟這麼快一早戰敗 背叛搖擺 乖乖飲奶 往日好勝已經不再聽命 仍然跳著當天脈膊便去把臂一天教唆 將往日的我 從陰暗心結裡讓我釋放 很想去踩 踩出偉大 想攻破公式規界 將他瓦解 分出勝敗 將你醜惡心態一一挫敗 這是搖擺 狠狠表態 趁未斷氣 製造氧氣 我未放棄 用最後這士氣 「賣乖」？「賣懶」就聽過，「賣乖」賣幾錢啊？賣乖乖呀嘛？ 「貴為帝軍」就要「興奮」？「興奮兵團」耶？ 如何可以「踩出偉大」？我都想試下， 「招數」又如何「戰敗」？ 「一早戰敗」又如何「這麼快」， 「便去把臂一天教唆」，死勒！文言文唔識添， 「這是搖擺」，又話「背叛搖擺乖乖飲奶」？ 「製造氧氣」？香港氧氣有限公司執得囉， 「士氣」係用「用」？點用咖？用左手定右手呀？ 究竟首歌係rock定係anti-rock呢？ 仲有D地方怪怪地，不過算把啦六師弟…… 新人嘛！

heyman@狂流 21/04/2005 12:15

大家講新人，點可以唔提狂流呀! 05新人，我地狂流梗係最勁喇，有成十首demo，雖然未有唱片公司肯幫我地出碟，但係我地首創網上jam歌，其實都唔係野小。 臨場表演o既經驗係就係少d，次次都出唔到場表演，搞到人地都唔搵我地出show，呢方面我地係比其他新人如張繼聰 、王菀之同謝安琪輸蝕，佢地起碼有係大學連場出GIG現場表演，點都有經驗過我地。 至於05年其他新band, 我最鍾意係呢兩隊︰ 1. Soler 2. Places Soler係由恭碩良個Fried Dino同Dino O既孖生兄弟Julio組成，恭碩良同Dino好friend, o係澳門由細玩到大，之前由阿Paul黃貫中主理o既汗樂隊，就由阿Jun打鼓, Jimmy彈Bass, Dino同阿Paul一齊彈結他，可想而之Dino都係勁結他人一個，如果唔係，點同其他勁人一齊玩呢？ Dino同佢孖生兄弟呢一對真真正正o既Twins組成Soler，兩兄弟拍住上，將來話唔定勁過Twins都唔定。大家想知Soler玩咩音樂，22號記住去城大睇佢地係大學連場出GIGo既表演拉。 至於另一隊Places，佢地係大學連場出GIG@港大有表演，唱o左首《Who Knows》，大家可以去呢條Link睇佢地 http://media.now.com.hk/pcwg/getit?categoryId=MUS_GROUP&productId=PCCW00005632&st=610&du=262 五人組合，成員係港大學生，個結他手拎支英國國旗結他又型，首歌又幾好聽，廿來歲大把機會。