1. 擋煞：十二月二十號頭暈下仆了一個不能再大的街、之後兩日後左手食指拉親，再之後響同事提完唔夠兩秒，俾刀片割到了一個細傷口。個個同我講，流血整親當擋左煞啦 ... 睇嚟我有好多煞要擋，擋都擋唔住。
   
2. 整餅記：整了一個朱古力榛子夾心蛋糕賀一賀藍姐牛一之喜。多謝你哋覺得係買番嚟多過親手整。一路手震一路整，好有中學時期上HOME E.的感覺 ! 令我好想好想買個焗爐番屋企大整特整一番，曲奇餅啦、薑餅啦、muffin啦等等等等 ....
   
3. 剪頭髮：本來無乜特別，特別在今次非常堅持要搞搞前面d蔭，相信留長蔭真係唔多啱自己。但實在係，究竟除左留長同齊蔭外，呢part頭髮仲可以有咩變法呢 ?
   
4. 平安夜：平安夜出去尖沙咀去剪頭髮，簡直就係同去地獄無分別，數唔出俾人撞左幾多次唔係重點，d交通改道、封路搞到個人毫無頭緒先係精髓 ! 加劇我大時大節唔去旺區呢個決心 ~
   
5. 敗家記：本月係重點敗家的節日 ..... 聖誕節實在係消費、令人破費的大好藉口。但本月 .... 最大成就暫時係買左阿強份禮，其他人請等多我一等。
   
6. 泰菜：唔知點解，可能本月凍的日子都算有，於是食辣嘢意慾係大增。好在年尾流流同陳公子食左一餐，個冬蔭功 .... d蝦同草菇好似食極都唔完咁，可以再encore!
   
7. 額頭紋身：廿五號朝早路經breakroom，聽到一段令我開心足一日。話說一個國內男子一覺瞓醒，發現自己個額頭有個 " 窮 " 字。無錯，係一個 " 窮 " 字響額頭。佢猛咁洗都洗唔走，以為自己撞邪 ! 但佢d朋友話佢知，實情係佢之前一晚飲醉酒，就走左上一個紋身師傅度 ..... 故事講到咁，相信大家都知 .... 我真係為呢單新聞，開心足一日。

真係攰 .... 精神體力上身心俱疲 !

心入面有一個疑問，困惑左成年。愈來愈走向終點 ..... 覺得好攰。唔想再停留響呢個問題上打轉 ...

好多事都會變質，好清晰咁知道事實，只欠接受現實呢一個最重要的部份。我最接受唔到的，應該係年半前所諗的，真係開口中。應該係祝賀自己直覺其佳，定係悲自己無能力改變現實 ?

唔介意定位 .... 唔需要任何定位，只係有值定唔值。依家，我唔敢講個值字出口。講違背心的說話，會俾雷劈。

只希望那機會真的係最合時的機會 ! 咁對大家都好 !

一子錯，滿盤皆落索

意思即：下棋時，只要一隻棋子下錯了關鍵的一步，整盤棋就輸了。(落索 = 輸的意思)

後來用作比喻：對具決定性的事物處置不當，將導致全部失敗。

不致於全部失敗，但不遠矣 ... 往往到了最重要關頭，我都有本事將所有我學過知道的事完完全全、徹徹底底咁忘記，我都好想了解下自己係咩構造 !

究竟係：

無可挽回 還是 傾盡全力 ?

我自己都唔知 ....... 內疚 ? 我想不會這樣想 !

港女的幸福星期天 ..... 我都好想成為一個港女 ! 但其實生活都好庸懶 ..... 同埋除左星期天外，基本上都好幸福 !

你睇佢地幾精靈 ! 佢地係我其中一日的午餐 ~ 無錯，午餐。午餐食凍蟹，何其奢侈。

我同自己講：呢d奢侈，係幸福。呢d時勢，有份穩定的工，有穩定收入；有假放，有飽飯食，唔多錢，但我夠錢用，唔駛憂柴憂米，仲想點呢 ?

所以其他野 ....... 無謂煩，無謂怨 !

放假，真係一個好日子。樂於沉醉在做妲己的生活，瞓到自然醒，行街食飯瞓覺娛樂，完全只有output，沒有input的狀態可言 .... 不過現實歸現實：假，係總會有放完的一日。

買起完銅鑼灣後，燒了一個烤；過了半日大海 ( 多謝阿劉同阿藍還我心願 )，執了一個屋，無聊攤抖了數天，還了很多睡眠債。真的這就是生活 ! 唯有偶然咁過生活，先會覺得辛苦係值得的。

尤其是當不斷當袋中錢係水咁倒出去用時，如果無之前的工作，又何來咁暢快咁駛錢。好明白一句何謂 " 我買  我擁有力量 " !

最感激的，仲係隔離屋響呢個禮拜停左鑽地鑽牆工程，否則我無可能睡得安寧，呢個係重點 ! 另一樣突破，可算係同呂生去食飯，實在好多年未試過。都好耐未有交流地對話過 ....

期待著下一次放大假，希望下一次大假係可以出國來放我的大假 .....

差d以為自己買起左個銅鑼灣 ... 我都好想買起左個銅鑼灣。

又話經濟唔好，但其實都仲有好多人響度消費，應該係一件好事。雖然無我想像中多人得咁離譜，但都可以算係人山人海。最可幸見到畫面係：同胞與港旗各佔一半。

買野能醫百病係真的 ... 真係可以。起碼買野時令我有點點興奮與安慰，唔會想起一d敗興之事。

除左買野，有d人係應該被買起的。

陳公子：

恕我咁遲先回應好耐年前討論的問題 ... 到呢一刻，我都覺得那個 " 叻 " 的問題，係近年才發生的，並不是一直都係。

可能係我高估左我自己，又或者我比較遲鈍。記憶中，並不是這樣的。只可以話好遺憾 ... 如果叻的其中表徵是要有 / 會有咁樣轉變同情況發生的話，咁我希望自己蠢一世。

以你悟性，同埋一路的你，都不能與我姐相題並論，大家共勉之。

當你無信用咭，你就唔會有先洗未來錢呢個習慣
當你無講過一個大話，你就唔駛去不斷講大話來掩飾你第一個大話
當你未試過大病一場，你唔會意識到原來身體健康呢種感覺有幾好
當你未試過有人離開你，你就唔會知道原來死亡有幾近

無可能未試過，就免疫；試左，都唔代表免卻左。撞了太多太多板後，我知道要點樣令自己過得開心d，於是可以唔睇的唔睇；唔諗的唔諗；唔聽的都唔聽 .....

 輕輕接近就翻了....我的天