坐言起行，建立了新BLOG:

http://miumiu-betty.blogspot.com/

        PCCW話送個3G俾我免費玩半年，點知還電話時佢話我要找$5xx，我問係咩？佢話係上網費，話我收緊中移動的時候上過網，我話係響香港上，佢話總之在接收緊中移動的情況下，無論在沙頭角定旺角，就係8毫子1k，我話唔知，佢話唔知都冇辦法，咁我話唔交，佢話唔得喎！既然冇得商量，只好我離開…

        首先，我Netvigator每月$18x，會9/9Cut；仲有NowTV每月$14x也會在9/10Cut埋，起碼佢每個月賺少我$33x，最慘係我條電話線（其實冇咩用，因為手提D分鐘永遠講唔晒），我老公唔知頭唔知路，上年12月話繼續用，一應承就自動續約18個月，原來每月俾成$13x，唔怪得咁好死送了個室內無線電話給我們啦！（可惜至今仲未用過）唉！男人真係永遠唔計細數，原來每月交緊PCCW成五百銀，難怪唔知錢去咗邊…

        最後，我打了去一間寬頻公司問價（其實以前用過，網路ok，勝在夠平！但冇事由自可，有事就把幾火），佢話18個月合約，每月$109，仲送一條電話線！唉…原來電話線係可以免費，但我要俾$13x一個月，用到出年6月先可以停囉！Anyway，我打算開個新Number用埋果條免費的電話線，如果ok好用，直頭俾錢PCCW停用算數，反正咁多個電話都冇用，都唔貪用多幾個月，免得夜長夢多，就當千幾蚊買個無線電話啦！

         昨天去了珠海玩，未出發已經要買成$177船票，坐一個小時多少少，感覺好貴，因回程還要再買票，即未計洗費，已花三百幾蚊交通費，所以一定要過夜，即日來回實在太「喇痢」，幸好酒店住宿和膳食方面都算便宜，尤其是小費方面，在珠海沒有小費政策，但Service都OK！好過深圳近乎強索貼士多多聲！

         第一日我去了「夢幻水城」，都幾大幾刺激，不過大部份游戲有限制高度和體重（因為幾危險），如你身高Over175cm或體重Over75kg，又或者畏高、唔識游水等，就慳番d錢，唔駛去了！因為去了都冇得玩，只有漂流同造浪池可以玩得到，但不介意花入場費，可以試下個漂流，好似以前OceanPark條「開心河」的加強版，係全程最好玩！

        第二日去了聞名的「皇朝五月花」飲茶，點心好特別好正，果然名不虛傳，雖然我們叫碟碟都「超、頂、特」，好似好嚇人，但原來中午2時前埋單，點心打6.8折，最後2個人叫了9碟（飽到頂胃），埋單只係￥70。推介：流沙包、牛奶腸粉、荔茸雪糕包、燒賣、灼菜心（超鮮甜）。

        之後去了拱北，行了一陣買了2套韓劇（￥50 x 2）同格仔板LV皮廢紙筒（￥30）。入了間休閒中心做香薰按摩（￥50 x 2小時），Service好，但應該選中式（￥30/小時），因為她們唔識用香薰按。按完過關去澳門，入回力賭場玩$200，玩了4盤就輸晒！跟住趕回香港餵我家隻「極地雪貓」<--隻「為食肥嘢」昨天餵幾多佢就食幾多，今天當然餓到暈啦！

        今日去了找大姑姐飲茶，食番個又平又有水準的叉燒燒肉飯。傾開佢以前個Friend，雖然生了2個女，但識了個後生仔就要同個老公離婚，唉…呢排聽好多！我唔係話保守，不過以前真係好少，多數都係男人有二奶，現在反而係女人有第二個，個老公要留住個老婆…世界真係變化大！奉勸男人不要太過自以為是，珍惜身邊的女人，否則真係後悔莫及！

        中午，還書遲了被罰$13.5，激死人！之後去惠康入貨，取了4個印花，遲早我就可以換Tigger ，正！

        終於Update了消防網球隊個Web，加了留言板外，另加送流量計，希望班消防佬鍾意啦！順便加埋阿妹去謝師宴的上妝相入去MIUWANG.COM度，有空入去睇靚女啦！

         頭先寫完Hompy，我就申請了留言板及數字計，順手Add埋入我個miuwang.com裡面，Upload完一看，嘩！已經九點，於是在家中找食物，後來做了咖哩肉鬆香草意粉，一邊吃一邊煲劇「惡作劇之吻」，不過唔夠喉，所以食埋雪櫃裏的Mega、榴槤雪糕同雪糕糯米糍，今次有排先減得番了！

        幾天無寫HOMPY了！又話要寫日記，點解無寫呢？因為懶…

        上星期四晚，有人成點鐘先返，所以星期五就要還以顏色，約個FRIEND去apm HIGH TEA，我們好久不見，但兩個女人總是有說不完的話題，可能這就是我們投契的原因，不過呢個FRIEND成日都點醒我，今次佢帶給我一個「二十八十的法則」，唔知下次又會係D咩？不過做FRIEND最重要係大家開心，她HAPPY即是我HAPPY，恭喜她成功轉去另一個新環境，離開一些不想多見的人。（Hee…最衷心的一句）

        星期六，中午按摩（無力水），得一肚氣，算了吧！可能我好快有咗，成年唔幫襯。晚上在家中看劇看電視等，國際台做正邪電影人物前100名倒數，大部份都是我未出世的電影，連頭十位的正與邪角色中，都只有幾個我認識：No.10白雪公主裡的魔鏡皇后、No.9異形、No.6沉默的羔羊裡的珠迪科士打、No.3占士邦、No.2奪寶奇兵裡的Indiana Jones和No.1沉默的羔羊裡的變態『食人魔』萊克特博士，但我最怕的Freddy（猛鬼街），只排三十幾，真係唔知邊D人負責排名。看完後我熄電視，個天猛閃，冷氣機不停滴滴答答，唔知點解好驚，睡不著，向窗外看，D雨好似花灑噴霧，再開電視一看，原來黑暴了！

         星期日，教畫後去太子探貓貓，可惜未開門，所以去了隔離紅螞蟻，然後在始創行了一陣，買了三個糯米糍，之後轉去聯合行，買了2件Tee，之後回家換衫，去維景打Tennis，晚上去鯉魚門食海鮮，再趕回家看「法證先鋒」大結局。

          今天看了一陣股票，然後在網上看「SUPER」，順便食埋昨天買的糯米糍，後來見到有「新X師妹3」播，於是再睇埋，後來發現我老公悶到發瘟，就同佢落去合作社食飯，然後游水，至於今晚吃什麼，仍未有著落，再看吧！

        今天起身看了陣股票，就一邊Mask"ing"一邊做美腿魔師，之後打俾大姑姐諗住飲完茶先搬屋，點知佢已經心急到搬了一半落樓，於是拿拿臨趕過去，惟有搬完先食，點知佢原來買了碗燒肉叉飯打包+一隻麻蓉煎堆仔，所以在等Van仔的時候就食了頂肚。雖然份量不多，但水準不俗，尤其是燒肉，層皮脆卜卜，肉則三分肥七分瘦，後來大姑姐話唔係撞彩，D燒味係日日都咁靚，而且每碗都只係$8.8，問你服未？

        搬完已經三點幾四點，所以去了新蒲崗食粉麵，每碗只係$10，撈麵就$15，加任何冷熱飲都係$5，所以飲凍檸蜜就最抵！食完之後返去將廣Fax資料俾教車師父，咁我今年的暑期活動就係學私家車了！

        至於夜晚？唉…咁早寫hompy就知我得閒啦！總之就有人風流快活就有人愁啦！