今年暑假終於打咗第一個8號。嗰日攪到全香港嘅交通大混亂。地鐵、巴士大塞車。啲人係咁投訴，又話呢樣又話個樣。有嗰大肚婆話地鐵太耐冇打風，安排得好差。呀李健和返唔到坪州又話管埋層冇用安排失當。講真風大浪大俾你返去，中途出事咪一樣又閙？個決定咁易做嘅，你重駛係到嘈咩？  其實係大家大耐冇打風，忘記咗其實次次打風都咁混亂就真！

入咗呢行，打風變得唔關我事。因為打風我要返工，黑雨亦要返工。冇話可以即刻走人。以前揸車時，無論乜風都照返工，更加無所謂。不過家陣揸羊，打風落雨都要同大家一樣，爭巴士迫地鐵。唉.....

上幾個月時，我係 YMCA 學緊 level 2，家陣終於學完攞埋嗰牌。可以係京士柏玩。攀總同 YMCA 好鬼衰，兩個地方分開嚟學。YMCA 個牌只可以係 YMCA ；攀總只可以係市政局玩。兩個地方分開哂，玩得唔方便。如果要玩，要學哂兩個牌先可以玩得開心。

攀石呢樣嘢，係阿 John 帶我去玩。我初初唔識玩，不過好有興趣，咪跟佢去囉。佢老人家之前係 YMCA 學咗，不過冇攀總牌，所以叫埋我一齊學。初初重以為好易，用力就得。玩耐咗，先知到咩叫 Technique。呢幾年，接觸嘅活動多咗，了解到原來每一樣嘢，都有佢背後嘅理論，知識。唔係講吓、玩吓就算。真係要認真、努力去學、去練習。

由於經驗淺，係京士柏個場出唔到 Celling。不過唔緊要，遲啲一定得。我講過嘅嘢，一定會做。因為我都係一個肯努力下苦功嘅人。

好耐冇寫，因為都幾忙，發生咗嘅事都有唔少。我會遲啲寫番嘅。 Topic 有太極推手比賽、攀石 Level 2、Summer Sem同遊艇河。

29-07 去咗遊船河。雖然嗰日係我生日，不過嗰日冇乜人知，當然冇興祝啦！但唔緊要，因為之前嗰日去咗寶寶屋企燒雞翼，重切埋蛋糕呀！

嗰日上船，一早去到白沙彎，好辛苦先揾到嗰位泊車。原本約咗阿蘇，但絛友放我飛機。亦都揾過阿 John，但大醫生佢嗰日要 Call，Call 哂成個 NTE 喎，所以唔去。(但後來佢全日係屋企瞓覺)好快啲人就到齊哂，有Ricky 啲 friends，渣哥兩公婆等，就坐駁船出去。上到阿謙架船，原來我地係最遲，所有人到哂等我地，幾大牌呀！

我地唔响西貢上船係因為西貢碼頭太多人上船，分分鐘等成粒鐘都未出到海。我地目的地係去"滘西西"(唔知邊度)，嗰到附近有一個魚排、一個沙灘。我地去到揾咗嗰位泊船，之後就開始自由活動。

我地一個個跳落水，攞埋水泡。識游水嘅落，唔識嘅都落。有啲人就去咗 Wake 先，有啲就玩水、去沙灘。我捉咗二小姐落水，俾個 Bodyboard 佢。因為佢唔識遊水，所以我就拉塊 bodyboard，拉佢出沙灘。去到沙灘，已經好多人。我地都係玩吓沙(幾廿歲玩沙)，用沙堆咗三個 "沙人仔"(好似雪人嗰啲)，擺響沙灘上就走咗。因為我地冇相機，所以冇影到相有啲遺憾，佢地三個好 Cute 架！不過我見到有個女仔同佢地影咗張相，我係到呼諭，如果有邊個 7月29日去遊船河時影咗三個沙人相，sent 返俾我呀，唔該！

之後我又拉二家姐返船，因為差唔多夠鐘食嘢。另外，第一批 Wakeboard 都返來，大家都返去唞吓。其實我都想再落水玩架，過嗰時啲風向同水流都向住我地，攪到架船附近有舊 "車" 浮下浮下，趕哂我地上船咋。

食完嘢，又落水。今次到我同二家姐去 Wake，當然重有其他人啦。係海同大陸真係唔同，大浪啲、難玩啲、幾辛苦下。二家姐直情上唔到水。佢係大陸都好地地，真係唔知點解。我嗰批，有好多都係第一次 Wake，所以都冇乜人玩到。渣哥係之後嗰批玩，但今次條女響到，個人都唔同哂，終於俾佢上到水，威返次啦！

再返上船後，我地玩跳海！走上上層，六個人差包剪揼，輸就跳落去。我真係黑得好緊要，冇輪要輸一個、兩個、三個、四個定五個，我都有份跳！黑到爆！下層啲人淨係見我不停上上落落，係咁輸，係咁跳，瘀爆。我只有一次唔使跳。就係六個人，輸咗嗰一個唔使跳，而我就係嗰個！講真，我嗰次真係唔知自己贏定輸囉....

玩到五點幾，回航返屋企。成班人食完晚飯就散。返到屋企，散哂。但係未完架，有後遺症架。之後病咗，同埋甩緊皮，好痛架！不過我地約好咗下次一齊去番禺長隆水上樂園，再玩過！

家陣十二點幾，仲未瞓，但好攰。睇緊溫布頓。每次講起網球就諗起中二學網球嘅事。嗰時有個由綱網總同 Rebook 合辦嘅網球訓練班，由於名額有限，又平 ($100十幾堂)，有波送，又有拍送，我當年即刻同 PE 阿 Sir 報名。不過我嗰時真係好想學網球，睇見啲人打到呀呀聲，形到爆！加上嗰時識打網球好架勢架，因為呢啲係有錢仔或名校先有嘅運動嚟架。

呢啲咁筍嘅嘢，係學生裡面竟然冇人吼。阿 Sir 見冇人吼，就叫哂佢啲心腹去學，重自動幫佢地報名。當年阿Sir佢淨係識打籃球，佢啲心腹自然清一色係籃球仔。而我學校又好怪，除咗籃球外，其他運動冇乜人玩，亦都唔受重視。成班唔鍾意網球嘅人去學網球，結果咪得番我一個孤兒仔代表我間學校。話佢地唔鍾意會唔會主觀啲呢？我都問過佢地會唔會去學架，佢地都話會架。都頭來，我學波時，佢地都有練波，不過係喺學校打籃球啫。成個 Course 就咁浪費咗，我每次上堂都好懢介，因為佢地丟哂我學校假。

當然老師都有錯，我唔介意偏心。不過令到啲機會咁樣浪費咗好唔抵。暑假後我有同阿 Sir 講番架，不過點會有用吖。所以為人師表係好重要，因為你嘅學生係點，就係你教出嚟。其實我都好想做 Tutor 架，不過我唔在行寫文，另外我又唔捨得留係 Clinical。我都取捨唔到我啲 Knowledge、experience 留俾同事、病人，定係我地嘅將來好。

自從公務員加薪達 5%，好多政府資助團體都發起加薪遊行。雖然我認為公務員人工係要高啲，但我唔反對人地為自己嘅利益、權利去遊行。

政府公務員體係同私人機構唔同，人工福利要好啲，目的要勉留人材。公務員要為社會服務，梗係要啲叻啲醒啲嘅人先得。其次，要留住呢班人材。無論經濟好壞，都要有班精英去招呼班大帝嘛。好似家陣嘅 Nursing咁。啲 New Grad 全部去哂私家，或者啲資深護士去哂護老院、resign 返屋企凑仔。剩返嘅精英唔多，社會對我地要求又高。如果冇乜理由或誘因，我點解重留係度？你可以接受經濟好時冇姑娘係公立醫院嗎？

我好羨慕其他機構嘅同事。好似醫生、社工、教師。一話集會，即刻叫成千人出嚟。但我地 Nurse......唉......

最衰今年七‧一要 AN，如果唔係實去！！

繼續…

28-05-07

一早起身飲茶。1415 响文化中心婚姻註冊處行禮。除咗二小姐屋企人之外，多謝黃太、梁太同埋森哥咁遠水路嚟 “觀禮”。另外都多謝阿孝同阿 John。嚟唔到都有嗰電話。渣哥就影都冇(佢自己話一定到)！不過大哥佢家陣好忙，秒秒鐘幾廿萬上落，邊得閒理我地呢啲閒人吖！

夜晚返 “外母“ 到飲飯，買咗識喪笑嘅 Elmo 俾外母，佢玩呀 Elmo 玩到唔停得手。Elmo 以後叫做 “細仔”！

29-05-07

又係一早起身。同太太去見師傳！因為佢終於肯去要拳啦！夜晚同老婆、Ricky、阿孝、渣哥、渣哥新女友去睇魔盜王。好多人，但都唔好睇嘅。

30-05-07

上半日無所事事。因為要儲電夜晚去爬石仔。我、二小姐同映紅一齊係京士柏學 Level 2呀。好彩係第一堂，温書多，唔使點用九，唔係好攰。 但第一次接觸 18 塊板(18米高)嘅石牆。

31-05-07

又係一早同老婆去耍太極，之後同師傳師食飯飲茶。回家後無所事事，夜晚出街食飯，唔覺意買咗一隻暴力熊公仔比自己。我原來真係好鍾意暴力熊架！

01–06-07

今日好忙，一早要返醫院 Body Check。嗰 Result 唔係咁好，年紀大真係要注意吓。另外返 Ward 派餅，冇乜人信亦都估唔到我地結婚，佢地好 Suprise。當然要多謝某啲人守得秘密啦！我最鍾意啲人估我唔到，只有個結果出咗嚟咪知我做過啲乜囉！另外，瑪姬把口真係好衰，亂咁講嘢，唔知到又亂咁噏，離哂普！

夜晚第二堂 Level 2，今日真係攰，因為要出 Overhead，有啲難度。加上阿 John 條仆街昆我宣咗對細碼鞋，話攀石鞋係咁喎！着到隻腳勁痛！條 Lane 又難爬、腳又痛，辛苦到爆！幾粒鐘前又咗錯嘢，哂咗啲電。咗錯乜？咪買咗部 Wii 囉！係屋企玩完 Wii Sport 先出去爬石，唔冇電就有鬼囉！

02–06-07

朝早同二小姐、四小姐去耍拳，耍到十一點鬆啲就走人。一嚟因為見到靖剛，條友仔痴咗，冇啦啦話我整散佢同 Ivy。大佬你自己移情別戀又入我數，總知比人擺上枱。其次我地三個想去唱 K Lunch，好耐冇唱 K 嘛。另外，四小姐想打 Will 喎！咪一齊走囉。

唱完 K，打完 Wii 同阿孝、Ricky 去遊車河。阿孝部舊車俾人偷咗，之後買咗部新車，咪要試吓部車囉。我地係西貢食完海鮮，然後入深井食糖水，再落太子飲嘢。阿孝猛讚自己部車，過又真係幾正。Ricky 就 Down Down 地，佢架 325i 刮花咗少少，真係好少，少到好難睇到。但佢話肉痛喎，重話要換過部車喎！有錢仔嘅世界真係唔同啲。

03-06-07

朝早懶惰，冇耍拳。反而叫咗四小姐嚟打 Wii！唉，呢啲真係毒害嚟架！夜晚又約咗 Ricky、阿孝打 Tennis。打完 Tennis，食完飯成十點幾，阿孝話要上嚟打 Wii 喎，OK 噃！我同佢第二都放假，佢係我到打到兩點幾呀！平時打拳我贏佢唔到，係 Wii 到我 KO 咗佢呀！哈哈~~

04-06-07

最後一日假，第二日 AN。中午約咗阿孝 (又係佢) 去 Club 打 Tennis (又係 Tennis)。諗住曬太陽，曬黑啲，但曬唔黑....

之後返屋企食飯、打 Wii (又係Wii)，但寶寶同核突都係到噃。同拒地去容記食飯，之後返屋企打 Wii。寶寶打 Wii 仲打到唔捨得走，俾核突鬧。哈~~ Wii 真係塗毒人架！

我個假，咁就完咗 Lu~~

放咗差唔多兩個星期，見到假就完，唔係好想返工。呢兩個星期好忙，但好開心。

21-5-07

一朝早同伯母飲茶，之後執嘢，同二小姐兩個人夜機去關島結婚。

22–5-07

早上 0600 到埗，由於安排失當，係酒店 (Pacific Island Club) 呆等個幾鐘先上到房瞓。由於係機上瞓唔到，一返房即刻失去知覺。0900 起身準備中午嘅婚禮。

當日好鬼晒，我又唔夠瞓。啲相影到我面青青，眼又咪起晒，勁醜樣。我同二小姐係 St. Lauguna Chapel (最靚、最貴)行禮。行完禮，影完相，勁攰！夜晚係 Jamica Grill 食 Dinner。之後返房繼續不醒人事。

23-5-07

由於太攰，早餐(免費)後瞓到中午。出去 shopping 一陣，返酒店再瞓。晚餐係 Hyatt 食 Buffet，之後去 Chamorro Villiage 睇吓。Chamorro Village 係當地嘅特色土著，但到 (Chamorro Village) 同 Buffet 一樣，冇乜特別。

24-5-07

去 ABC (Alupang Beach Club) 玩水上活動。Jet Ski， Parasailing，睇海豚，浮潛。玩足一日，正！重有好多好 Kawaii 嘅日本妹著 Bikini，重正！晚餐係酒店 Sunset BBQ。景好靚！

25-5-07

今日返香港，執好嘢 check out。之後去咗 Underwater World 水族館睇魚、買手信，晚機返香港。咁就玩完。但第二日要早起身。

26-5-07

一早七點機比阿孝整醒。因為約咗 0830 係深圳等。約咗渣哥同 Ricky 去玩 Wake Board。玩到三點幾，之後係大陸過夜。Wake Board 趣事，遲啲再寫。

27-5-07

中午返到屋企，之後去咗中環還婚紗。夜晚同 “太太“ 嘅親戚食飯，又俾佢啲舅父隊！佢啲舅父好鍾意隊我，都唔知點解。另外，唔係好慣 “表姐夫“、“姐夫“、“姨丈” 嘅啲稱呼。

好多人都知道我同阿 John 好 Friend。我地得閒有出嚟爬石呀、打交呀、飲酒呀咁。我唔會當佢係同事，因為我識佢時佢未畢業，重係 Med Student，我淨係當佢係朋友。

不過呢條友好煩，只有佢揾你，冇話你可以揾到佢。佢唔鍾意講電話，所以佢部手提唔會響。唔響唔緊要，可以震。但佢有怕煩住哂，所以佢部電話只會閃，唔響唔震。但條仆街又鍾意將部電話袋入袋，即係冇人揾到佢！

前排係我未去關島前，拒同我講成個幾字電話，我知佢有啲唔妥。於是揾咗佢飲酒，聽佢發吓牢騷。之後佢話需要一啲生理上嘅發洩，咁未約佢第二日去發洩吓啦，點知就出咗事。我第日放工返咗屋企等佢電話，你知啦，只有佢揾你冇你揾佢嘛。五點幾六點佢終於打嚟，但佢話睇緊醫生。醫生睇醫生？！佢係同 patient 插 Foley 時，佢同姑娘俾 patient 啲 BLOOD stained urine 整到隻眼。但個 patient 係 PCP 緊 ，? HIV +ve......

原本 down down 地嘅佢，即刻 down 哂。想去發洩，但又中咗招去唔到。家陣重要食半年 prophylaxis。食咗藥，啲 S/E 又出哂嚟。Fatique、anaemia、liver failure、alopecia、GI effect 等。又要戒色又要戒酒，佢呢半年有排捱。半年後睇怕佢都變咗得道高僧囉！

不過唔係問題，我同阿 John 約好哂朋友半年後幫佢 "還俗"！嘻嘻...