樂樂 今次終於買到成日都諗住買 終於得到喇

好得意 又好恐怖

今晚天氣好好 好涼爽 成晚都有風 好舒服

我諗今晚去既人都會覺得好舒服~!

好入正題喇~

我地一行三人 係至尊飛既

5:30係大樹灣入場~

至尊飛有自己既入口

所以都唔係好多人入

厲鬼村

入到場 即刻就去左厲鬼村

普通飛已經有好多人排緊 打左幾個蛇餅 我諗有1.2百人

至尊飛就好少人排 我諗得20-30人到

好快就入場喇 大約20幾個人入左最右邊部LIFT=_=

突然黑晒 冇晒燈 跟住震左一陣 有有返D螢光

跟住全部人就出LIFT 一路行 好黑 基本上睇唔到D咩

入面都係一D屋村既場景 有D鐵閘 肉檔 ........

加上真係好多人 真係好多人=-=

前前後後 我諗有成7.8個人一齊行=_=

所以唔係好恐怖...場景就幾好既 幾真

但條路太細 太短 成7.8人一齊行 點會恐怖呢=_=!

大豪「嚇」娛樂城

玩完厲鬼村出返黎 旁邊就係大豪「嚇」娛樂城

排隊既人唔係好多 普通飛大約有60.70人 至尊飛得10幾人排

好快就入到場 今次好D 因為人唔係好多 而且我覺得

大豪「嚇」娛樂城 係恐怖過厲鬼村 場景靚過厲鬼村

入面主要都係一D玩樂既場景 有桌球枱

麻雀枱 卡拉OK  仲有幾部真既街機^^

變種瘟疫

普通飛大約70.80人 至尊得10幾個

呢個好悶 不過勝在途中可以望下風景

因為行行下有後路係可以望到海景^^

廣昌隆謀殺案

排既人唔係好多 普通飛大約200人 至尊就得廿幾人

呢個係大家一齊坐係到 聽野

其實呢個係幾好玩 可以好恐怖 但實在有太多問題......

大約30人到入一間房 跟住就全部坐底 戴上耳筒 聽故事

聽緊既時候 係冇晒光 全間房黑晒 有時會噴下水 有時噴下風....

但係 咁岩我地果30人當中 有一班人

成程不段係到講粗口 又係到笑 又用燈係到照.......=_=

搞其他人都唔可以專心聽故事

只聽到佢地講粗口同笑 而且又冇鬼

出黎嚇我地 好快就聽完 咁就玩完=_=

迷幻空間

呢個好多人排 普通飛大約有200.300人排 至尊就廿幾人到

呢個我覺得幾好 入口位係一架紅色小巴改成

入到去 開始四面都係鏡  跟住就好多螢光燈 ....總之就好暈>.<

呢個好得意 好靚 唔係好恐怖...不過會有小小暈...

鬼娃工廠

普通飛大約有100人排  至尊得幾個人^^

不過放左人入去之後 都仲要排

果陣就至尊同普通飛一齊排隊等入場~ 同廣昌隆謀殺案一樣~

呢個場景 我諗都算係最恐怖 有好多娃娃

同機器係到製造娃娃 又有好多大既娃娃屍體.....

>.< 真係好得人驚

而且呢間鬼屋都算大 樓底幾高 所以入到去既感覺

會同其他鬼屋感覺有D唔同 會驚D~>.<

同埋D鬼娃娃真係.........>.<

戲棚驚夢

普通飛大約有50.60人排 至尊得10個人到

呢個入場之前 會有個戲棚領班講解小小比大家聽先

跟住先開始入去 場景都算OK 有好多大戲既用品場景....

但係冇咪特別 又係好悶=_=

兵馬俑異域

呢個唔係好多人排 我地去到即刻都入得

呢個場景好似拍戲果D地牢咁 有D兵馬俑

呢個場景黎講 我諗係最差 唔恐怖

但係因為好少人排呢個 今次我地入去 得5個人

我比人迫行第一=_=! 所以都幾驚下>.<

到兩場SHOW~

勁舞DANCING蛛

有2個女DANCER 係到跳舞

係強勁既音樂底下 加上有人跳舞 氣氛幾好

不過...大家去到自己睇就知道差D咪野 各花入各眼

鬼魅花生騷

有一個男一個女既設計師 仲有一個主持

係到舉行一個時裝花生騷

男女設計師 分別有兩款作品

由兩個魔DO着出 其中一個魔DO係現場觀眾

仲會搵3個現場觀眾做評判

幾搞笑既 有時間去睇下~~

係玩呢8間鬼屋其間 我地仲玩過幾個機動遊戲

有食過野 有休息過 仲停低過影下風景..

去到坐纜車 都唔使排隊 仲可以自己人一架車 唔使坐滿

加上今晚天氣真係好好 成晚都有風 好涼爽  坐纜車由其舒服

成晚都係慢慢行時間好鬆動 5:30入場

9:30已經玩晒8間鬼屋 幾個機動遊戲

其實哈囉喂做得幾好 氣氛好好 而且場景都做得好好 好幾真

我最鐘意果種氣氛 好似一個大派對

不過......真係太多人 雖然至尊飛唔使點排 真係好快

但同一時間 太多人一齊入鬼屋 一間細細既屋仔

有成 10幾20人  同時7.8個人一齊行

點會驚呢=_= 而且有好多人完全唔投入去玩

又唔識尊重其他人

係到大聲講野(唔係怕果種大叫)

又話呢樣假 呢樣唔得 周圍係咁搞D野........

搞到其他人都玩唔到.......我發覺有好多呢D人~

總結~我會比80分

絕對要去 好玩 氣氛好

但 唔好有咁大其望 真係當去一個大派對

成班朋友玩一晚就幾好既~

仲有 一定要買至尊飛 唔好睇有D鬼屋

普通飛同至尊飛只係差幾十人排隊

間間差幾十人 加埋就差好遠

當然有普通飛既人係玩得晒8間鬼屋

但我諗有好多普通飛既人 係玩唔晒

都唔好話玩機動遊戲

至尊飛真係快好多好多 時間會好鬆動~

每年我都好想去哈囉喂
但每年都搵唔到朋友一齊去
一係就D朋友去左
一係就約唔到時間
一係就好驚 唔敢去
一係就買唔到飛

今年一如以往
開始都約唔到朋友
但係都諗住買左飛先
點之D飛一早就冇晒 網上訂票賣晒
咁就諗住網上BID 但係我想去果一日
D飛都差唔多比人BID晒 最後比我搵到有個人放
500蚊一張(原價$395) 咁我都諗住買
後來又驚果D係假飛   海浪公園仲有至尊晚餐飛賣
但要580蚊一張 咁我就諗 500蚊一張可能係假既飛
不如加80蚊食埋餐飯   於是就打去公園問 係公園售票處
有冇得賣  仍話有 咁岩我又放假 就入左去公園買喇

入到去 個哥哥話 仲有小量果日既至尊飛喎
即係$395果種 嘩....好開心..即刻買左幾張
節省左幾百蚊......    

今日終於到自己放假既時候打8號風球

打風  好多鋪頭都會關門

但同時有好多行業 生意會反而會仲好

租碟鋪就係其中一行 我本身好鐘意睇戲

係戲院睇完 都會買埋隻碟

但搬左新居好 附近冇賣VCD既鋪頭

只有租碟鋪 所以只好租黎睇

每次打風 租碟鋪都會好多人

岩岩落街買野 都諗住去睇下有咩好戲睇

睇睇下 見到一對情侶 佢地既對話如下:

女朋友: 你真係諗住租呢隻呀?

男朋友: 係呀

女朋友: 下 唔好啦 呢隻你實會訓  一定睇唔到1/3

男朋友: 妳鐘意睇嘛

女朋友: 唔係我鐘唔鐘意睇呀

              次次睇親戲 都係得我自己一個睇..........

每對情侶之間既相處

都有佢地自己既一套

呢對情侶 我諗係男朋友唔夠細心

以為遷就女朋友 佢就會開心

我諗呢個問題 好多情侶之間都會發生

但我諗果個女仔 真正想個男朋友細心D

對大家之間既事上心D 多D了解自己想諗緊咩

最緊要係用個心陪住自己 唔係只係個身體

近排全世界既焦點

相信都係奧運 包括我在內

每日都會留意各場賽事

岩岩睇完田徑400米既賽事

就令我諗起當年我都有參加過400米跑... ...

點解會參加400米

因為100米 200米 我係一定嬴唔到

所以就選擇左400米

我一向都唔係跑開步既 點解當時會參加

係因為受同學既影響 個個都參賽 咁自己都玩埋一份

好明顯 因為自己無經過訓練 係即時興起去參與

所以 跑到差唔多200米左右 已經無咪氣

但係見到看台上 好多人為自己打氣

氣力又突然之間回升

跑到最後100米 我記得當時我係跑第三 (總共4人比賽)

當時聽到見到 好多人為我打氣 加油 加油 努力......

當時感覺好激動 用盡所以力氣 不段向前跑

最終跑第二

試想下 如果無任何人睇自己比賽

只係選手自己係到比賽

咁仲有冇意義

又或者咁講 所有事情都係一樣 需要有人分享

如果唔係 任何事情都變得無意義

又再一次證明 開心既時間過得特別快

返工已經成個星期

9天的大假 好快就完結

今次海南島之行 都幾開心

行程都OK 食既玩既都算唔錯

最好玩既就係 我咁大個仔第一次潛水

真係有好多魚 不過好得意 雖然有好多魚係身邊

但我一條都摸唔到

今次旅程 最滿意既就係住宿喇

間酒店好令 間房仲令

相就唔係影左好多 比大家睇下酒店景啦!

開始放大假

下星期去旅行

YEAH~!

近排經常會見到小朋友

1.2歲 2.3歲 3.4歲

好多好多

尋日 就見到一個3.4歲既細路女

同佢媽媽 爸爸 細妹一齊 呀妹得幾個月大

我同佢地一齊搭緊扶手梯

個細路女同佢媽媽既對話 好搞笑~

   好可愛既細路女 :  我地係咪去冒險樂園?

                    媽媽 :  我地去買野先 買妳件公主睡衣呀 ....係咪唔買呀?

   好可愛既細路女 :  ( 靜左幾秒..... ) 我好眼訓.....!

                    媽媽 : 我知吖 睇得出 !